Qazaqstandyq IT mamandary qaı elderge qyzmet kórsetedi

ASTANA. KAZINFORM – 2023 jyly elimizde IT-qyzmetterdiń kólemi 1,4 trıllıon teńgege jetti. Bul – bir jyl burynǵy kórsetkishten 46,4 paıyzǵa artyq.

Energyprom.kz málimetinshe, rezıdent bolyp tabylatyn zańdy tulǵalarǵa kórsetilgen qyzmet quny 1,1 trln teńgeni, al jeke tulǵalar úshin 65,7 mlrd teńgeni quraǵan. Rezıdent qataryna kirmeıtin tulǵalarǵa 260 mlrd teńgeniń qyzmeti kórsetilgen.

Qyzmet túrlerine toqtalsaq, basym bóligi baǵdarlamalyq qamtamasyz etýdi ázirleýge tıesili: 383,9 mlrd teńge, jyldyq ósim – 49%. Odan keıin qosymshalardy ornalastyrý qyzmetteri jáne olarmen baılanysty qyzmet (229,1 mlrd teńge), baǵdarlamalyq qamtamasyz etý (167 mlrd teńge), aqparattyq tehnologııalar salasyndaǵy konsaltıngtik jáne tájirıbelik qyzmetter (88 mlrd teńge), aqparattyq basqarý qyzmetindegi memlekettik elektrondyq aqparattyq resýrstar men júıelerdi qalyptastyrý jáne damytý (76,5 mlrd. teńge).

Óńirler boıynsha barlyq ІT-qyzmetterdiń 51,9%-y Almaty qalasynda kórsetilgen (718,7 mlrd teńge). Bul - ótken jylmen salystyrǵanda 50,1%-ǵa artyq. Al kórsetilgen qyzmettiń 35,7%-y elordaǵa (493,7 mlrd teńge) tıesili. Keıingi oryndarǵa Qaraǵandy (44,1 mlrd teńge), Batys Qazaqstan (29,7 mlrd teńge) jáne Pavlodar (15,9 mlrd teńge) oblystary jaıǵasqan.

Sala boıynsha eń az qyzmet Túrkistan (869,6 mln teńge), Ulytaý (1,1 mlrd teńge) jáne Qyzylorda (1,6 mlrd teńge) oblystarynda kórsetilgen.

Aıtpaqshy, Temirtaýda Joǵary polıtehnıkalyq kolledj bazasynda jastardyń aqparattyq tehnologııaǵa degen qyzyǵýshylyǵyn arttyrý maqsatynda ІT lageri ashlyǵan. Munda on kún ishinde 100 qala oqýshysy ІT negizderin úırenedi. Lager pılottyq rejımde jumys isteıdi. Bilim berý baǵdarlamalary jas erekshelikterin eskere otyryp júzege asyrylady.

Rezıdent emesterge sektorda kórsetiletin qyzmetterge keletin bolsaq, AQSh-ta qyzmet molynan kórsetilgen (60,6 mlrd teńge). Bul - bir jyl burynǵydan 91,6%-ǵa artyq. Qyzmet alýshy elder arasynda ekinshi orynǵa soltústiktegi kórshimiz Reseı (42,8 mlrd teńge) turaqtaǵan. Úzdik úshtikti Ulybrıtanııa túıindedi, oǵan Qazaqstan 34,4 mlrd teńgeniń IT qyzmetin kórsetipti. Bul - bir jyl burynǵydan 2,9 ese kóp.

Qyzmet alýshy elderdiń alǵashqy on bestigine BAÁ, Kıpr, Irlandııa, Meksıka, Sıngapýr, Ózbekstan, Germanııa, Qytaı, Nıderlandy, Shvetsııa, Qyrǵyzstan jáne Belgııa engenin atap ótken jón.