Qazaqstandyq ınjenerler Kaspıı teńiziniń túbine baılanys jelisin tartý úshin zertteı bastady
AQTAÝ. KAZINFORM — Qazaqstandyq ınjenerler Kaspııge shyqty — olar Qazaqstan men Ázerbaıjan arasyndaǵy alǵashqy sýasty baılanys jelisi ótetin teńiz túbin zertteýdi bastady. Bul týraly Jibek Joly telearnasyna jańalyqtarda kórsetti.
Baýtın portynan arnaıy jabdyqpen jabdyqtalǵan keme attandy. Kemede — teńiz túbiniń relefi men topyraq quramyn zertteıtin mamandar bar. Olar sonymen qatar boljaldy marshrýtta kedergiler bar-joǵyn anyqtaýda. Bul baǵyt Aqtaý men Sýmgaıyt qalalarynyń aralyǵynda ótedi.
Osyǵan uqsas jumystar ázerbaıjandyq tarapta da júrgizilip jatyr. Eki eldiń teńiz túbine kabel tóseý týraly kelisimi osydan eki jyldan astam ýaqyt buryn jasalǵan. Negizgi maqsat — Azııa men Eýropa arasyndaǵy derekter almasýǵa arnalǵan jańa, tikeleı jol qurý.
Esep boıynsha, bul baılanys jelisi sekýndyna 400 terabıtke deıin derek tasymaldaýǵa qabiletti bolmaq. QR Tsıfrlyq damý mınıstrliginiń málimetinshe, qurylys kelesi jyldyń sońynda aıaqtalady dep josparlanǵan.
– Buǵan deıin Qazaqstannan shyǵatyn ınternet-trafıktiń kóp bóligi ózge elder arqyly ótetin. Kaspıı arqyly tóseletin sýasty VOLS (volokondy-optıkalyq baılanys jelisi) Azııa men Eýropa arasyndaǵy qysqa jáne tikeleı derekter jolyn qamtamasyz etedi. Bul arqyly elimiz derekter tasymaly salasynda táýelsizdigin arttyryp, sheteldik telekommýnıkatsııalyq arnalarǵa degen táýeldilikti azaıtady. Aldaǵy ýaqytta jańa tarmaqtar qosý, sondaı-aq jerústi ınfraqurylym men esepteý qýatyn kúsheıtý josparlanyp otyr, — dedi QR TsDIAÓM basqarma basshysy Azamat Seriktaev.
Eske sala keteıik, Transkaspıılik talshyqty-optıkalyq baılanys jelisi — Qazaqstan men Ázerbaıjannyń birlesken jobasy aıasynda Kaspıı teńiziniń túbi arqyly tóseledi. Kelisim boıynsha, jobany aıaqtaý 2026 jyldyń ekinshi jartysyna josparlanǵan.