Qazaqstandyq hırýrgtar Ózbekstannan kelgen naýqastarǵa 17 kúrdeli operatsııa jasady
ASTANA. KAZINFORM — A. Syzǵanov atyndaǵy Ulttyq ǵylymı hırýrgııa ortalyǵynyń 5 mamandandyrylǵan brıgadasynan quralǵan top Ózbekstan Respýblıkasyndaǵy Qazaqstannyń medıtsına kúnderi aıasynda tájirıbe almasý úshin Tashkent qalasyna bardy.
Ortalyqtyń jetekshi hırýrgtary 17 kúrdeli otany sátti ótkizip, ózbek áriptesterine arnalǵan birqatar master-klastar ótkizdi.
Sondaı-aq, A. Syzǵanov atyndaǵy Ulttyq ǵylymı hırýrgııa ortalyǵy men V. Vahıdov atyndaǵy respýblıkalyq mamandandyrylǵan ǵylymı-praktıkalyq medıtsınalyq hırýrgııa ortalyǵy arasynda yntymaqtastyq týraly memorandýmǵa qol qoıyldy.
Qujat taraptardyń birlesken ǵylymı jobalardy damytýǵa, mamandarmen almasýǵa jáne medıtsınalyq kadrlardyń biliktiligin arttyrýǵa baǵyttalǵan.
— Sapar barysynda professor Bolatbek Baımahanov ózbek áriptesterine Qazaqstan transplantologııasy men laparoskopııalyq hırýrgııa mektebiniń jetistikterin tanystyryp, baýyr transplantatsııasynan keıingi bılıarlyq asqynýlar men uıqy bezi-dvanadtsatperstnaıa ishek rezektsııasynyń nátıjeleri týraly dáris oqydy. Bul baıandamalar ózbekstandyq áriptesterdiń zor qyzyǵýshylyǵyn týdyrdy, — delingen aqparatta.
Sonymen qatar, qazaqstandyq dárigerler Tashkent qalasyndaǵy V. Vahıdov atyndaǵy respýblıkalyq mamandandyrylǵan hırýrgııa ortalyǵynda jáne Qarshy qalasyndaǵy respýblıkalyq kardıologııa ortalyǵynyń fılıalynda jumys istedi. Qazaqstandyq mamandar gepatobılıarlyq, endoskopııalyq, kardıohırýrgııalyq jáne endovaskýlıarlyq baǵyttar boıynsha otalar jasap, ózderiniń joǵary kásibı deńgeıin jáne zamanaýı emdeý tásilderin kórsetti.
Tashkentte gepatopankreatobılıarlyq hırýrgııa bóliminiń meńgerýshisi Meıram Doshanov baýyr men ót joldaryna laparoskopııalyq ota jasaý boıynsha master-klass ótkizip, kúrdeli 4 otany sátti oryndady.
Erlan Abdrashevtyń jetekshiligimen endoskopııalyq hırýrgııa boıynsha master-klastar ótkizildi. Onyń barysynda óńeshtiń jańa túzilisterin endoskopııalyq rezektsııalaý jáne peroraldy mıotomııa operatsııalary jasaldy.
Rentgenhırýrgııa jáne ınterventsııalyq kardıologııa bóliminiń meńgerýshisi Ádil Baıymbetov júrekshelerdiń fıbrıllıatsııasy bar naýqastarǵa krıoballondyq ablıatsııa protsedýralaryn júrgizdi.
Endovaskýlıarlyq hırýrg E.Abılhanov 4 joǵary tehnologııalyq ota jasady. Onyń ishinde qarynshaaralyq perde aqaýyn transkateterlik jabý jáne ókpe arterııasy stenozynda ballondy valvýloplastıka operatsııalary bar.
Kardıologııa ortalyǵynyń Qarshy fılıalynda ortalyqtyń kardıohırýrgııa bóliminiń meńgerýshisi Baýyrjan Raqyshev ózbek áriptesterimen birlesip 4 júrek otasyn júrgizdi. Olardyń qatarynda mıtraldy qaqpaqshany protezdeý jáne sol jaq júrekshedegi mıksomany alyp tastaý operatsııalary boldy.
Qazaqstandyq hırýrgtar otandyq hırýrgııa mektebiniń jetistikterin jáne zamanaýı emdeý tehnologııalaryn tanystyryp, ózbek naýqastaryna densaýlyǵyn qalpyna keltirýge jáne ómir sapasyn arttyrýǵa múmkindik berdi.
Ortalyqtyń dárigerleri buǵan deıin Túrkistan oblysynda ekinshi ret baýyr transplantatsııasyn sátti júzege asyrdy.