Qazaqstandyq gýmanıtarlyq kómek Tájikstanǵa jetti

ASTANA.KAZINFORM - 30 qyrkúıek kúni Dýshanbede Tájikstanǵa gýmanıtarlyq kómek tapsyrý rásimi ótti, dep habarlaıdy Kazinform agenttiginiń menshikti tilshisi.

Qazaqstannyń Tájikstandaǵy elshisi Ýálıhan Tórehanov Tájikstan Respýblıkasy Úkimeti janyndaǵy Memlekettik materıaldyq rezervter agenttiginiń basshylyǵyna 5 myń tonna mazýt sertıfıkatyn tabys etti.

Qazaqstandyq dıplomat eki eldiń strategııalyq qarym-qatynasy aıasynda Qazaqstan basshylyǵy Tájikstanǵa jalpy somasy 893,7 mıllıon teńge (shamamen 1,65 mıllıon dollar) gýmanıtarlyq kómek kórsetý týraly sheshim qabyldaǵanyn atap ótti.

Gýmanıtarlyq kómek Qazaqstannyń halyqaralyq damý agenttiginiń (KazAID) kómegimen jetkizildi jáne energetıkalyq qaýipsizdikke qosqan úlesi jáne qazaq-tájik yntymaqtastyǵyna tán tatý kórshilik pen ózara kómektiń kórinisi boldy.

Sońǵy bes jylda Qazaqstannyń Tájikstanǵa kórsetken gýmanıtarlyq kómeginiń kólemi 21 mıllıon dollardan asty.

Osyǵan deıin Qazaqstannyń Aýǵanstanǵa 272 tonna gýmanıtarlyq kómek jóneltkeni týraly habarladyq.