Qazaqstandyq gir kóterýden álem chempıony mınıstrlikti sotqa berdi
ASTANA. KAZINFORM – Qazaqstandyq sportshy gir sporty boıynsha álem chempıony Týrızm jáne sport mınıstrliginen tólemaqy talap etip sotqa júgindi.
Astana qalasynyń ákimshilik ister sotynyń habarlaýynsha, sportshy J. Týrızm jáne sport mınıstrliginiń syıaqy tóleýden bas tartý áreketin zańsyz dep sanap sotqa júgingen.
Ol 2021 jyldyń qazan aıynda Býdapesht qalasynda (Vengrııa) gir sporty boıynsha álem chempıonatynda eki saıys boıynsha birinshi jáne úshinshi orynǵa ıe bolǵan. Sonymen qatar sportshy - Hıva (Ózbekstan) jáne Cholpon-Ata (Qyrǵyzstan) qalalarynda ótken 2023 jáne 2024 jyldardaǵy gir sporty boıynsha álem chempıonattarynyń jeńimpazy.
- 2024 jylǵy qarashada talap qoıýshy mınıstrlikke álem chempıonattarynda joǵaryda kórsetilgen júldeli oryndar úshin syıaqy tóleý týraly ótinishpen júgingen. Mınıstrlik 2023 jáne 2024 jyldardaǵy álem chempıonaty boıynsha tólemdi júzege asyrý úshin qujattardy jiberý týraly akt qabyldaǵan. Biraq sportshyǵa 2021 jylǵy álem chempıonatyndaǵy júldeli oryndar úshin talap qoıý merzimin ótkizip alý sebebinen tólem jasaýdan bas tartylǵan. Birinshi satydaǵy sot talap qoıýdy qanaǵattandyra otyryp, jaýapker eskirý merzimin negizsiz qoldandy degen qorytyndyǵa keldi, - delingen sottyń sheshiminde.
Sot taratqan aqparatqa súıensek, QR Úkimetiniń 2014 jylǵy 19 jeltoqsandaǵy №1345 qaýlysymen bekitilgen qaǵıdalardyń 4-tarmaǵyna sáıkes halyqaralyq sporttyq jarystyń júldegerlerine syıaqy tóleý qarastyrylǵan. Sondyqtan talap qoıýshy sportshy halyqaralyq jarystarda alǵan júldeli oryndary úshin syıaqy alýǵa quqyǵy bar. Osylaısha Týrızm jáne sport mınıstrligi sportshy halyqaralyq jarystarda ıelengen júldeleri úshin syıaqy tóleıtin boldy.
- Apellıatsııalyq saty birinshi satydaǵy sottyń qorytyndylarymen kelisti. Sot aktileri zańdy kúshine engen joq,- deıdi qalalyq sottan.
Aıta keteıik, endi Olımpıada jáne Paralımpıada oıyndarynyń júldegerleri de syıaqy alady.