Qazaqstandyq gımnastshylar álem kýbogynda qola medal aldy

ASTANA. KAZINFORM - Ózbekstan astanasy Tashkentte kórkem gımnastıkadan álem kýbogynyń kezeńi máresine jetti.

QR Týrızm jáne sport mınıstrligi Sportty damytý dırektsııasynyń baspasóz qyzmetiniń habarlaýynsha, sheshýshi jarys kúni Qazaqstan quramasy toptyq synda 5 lenta jattyǵýynda úzdik úshtikti túıindedi. Komanda sapynda Jasmın ıÝnýsbaeva, Aızere Kenges, Aıda Hákimjanova, Madına Myrzabaı men Aızere Nurmaǵambetova óner kórsetti.

Nátıjesinde Qytaı 24.55 ballmen kósh bastasa, Polsha 23.00 ballmen ekinshi oryn aldy. Al Qazaqstan quramasy 22.20 ballmen úzdik úshtikti túıindedi. 

Jekeleı synda Aıbota Ertaıqyzy shyǵyrshyq jattyǵýynyń fınalynda 4-orynǵa jaıǵasty.
Aıta ketsek, sáýir aıynyń basynda kórkem gımnastıkadan ulttyq quramanyń bas bapkeri taǵaıyndaldy.

Bul qyzmetke Lola Ádilbekova keldi. Ol - halyqaralyq dárejedegi sport sheberi, álem chempıonattarynyń qatysýshysy jáne 2002 jylǵy Azııa oıyndarynyń komandalyq esebinde kúmis júldegeri.