Qazaqstandyq ǵylymı jýrnal álemdegi eń iri Elsevier platformasynda shyǵarylady
ASTANA. KAZINFORM - «Eurasian Journal of Physics and Functional Materials» ǵylymı jýrnaly Digital Commons Elsevier platformasynda shyǵaryla bastady. Bul týraly L.N. Gýmılev atyndaǵy EUÝ baspasóz qyzmeti habarlady.
Elsevier álemdegi eń iri ǵylymı baspalardyń biri jáne dúnıejúzindegi ǵylymı jýrnaldardyń barlyq maqalasynyń tórtten birin shyǵarady.
«Eurasian Journal of Physics and Functional Materials» jýrnaly Eýrazııa ulttyq ýnıversıtetinde 2017 jyldan bastap aǵylshyn tilinde shyǵarylady. Ǵylymı basylymnyń maqalalary Scopus halyqaralyq ǵylymı derekter bazasyna engizilgen.
Atalǵan jýrnal ıadrolyq fızıka, joǵary energııa fızıkasy, balamaly jáne sýtegi energetıkasy t.b. saladaǵy ǵylymı zertteýlerdiń nátıjeleri týraly materıaldardy qamtıdy.
Jýrnaldyń halyqaralyq redaktsııa alqasynyń quramyna Qazaqstan, Reseı, AQSh, Frantsııa, Japonııa, Fınlıandııa, Shvetsııa, Italııa, Ózbekstan, Anglııa ǵalymdary, sondaı-aq CERN jáne Birikken ıadrolyq zertteýler ınstıtýty sııaqty álemdik deńgeıdegi ǵylymı uıymdar kiredi.
«Elsevier kompanııasynyń ózi jýrnaldy bazaǵa qosý jáne elektrondyq nusqasyn shyǵarý týraly bizge usynyspen shyqty. Elsevier platformasynda «Eurasian Journal of Physics and Functional Materials» jýrnalynyń jarııalanýy jýrnaldyń ǵana emes, Qazaqstannyń búkil ǵylymı qoǵamdastyǵynyń damýy úshin jańa perspektıvalar ashady. Bul L.N.Gýmılev atyndaǵy EUÝ-da jáne Qazaqstanda júrgizilip jatqan ǵylymı zertteýler sapasynyń halyqaralyq deńgeıin moıyndaý», - dep atap ótti jýrnaldyń bas redaktory, EUÝ «Eýrazııalyq fızıka-energetıkalyq zertteýler jáne joǵary tehnologııalar ınstıtýty» ǴZI dırektory Qaırat Kúterbekov.
