Qazaqstandyq ǵylymı ataqtar EAEO elderinde moıyndalady
ASTANA. KAZINFORM – EAEO sheńberinde ǵylymı ataqtar ózara tanylady.
6-7 tamyzda ótken Eýrazııalyq úkimetaralyq keńestiń otyrysynda Eýrazııalyq ekonomıkalyq odaqqa (EAEO) múshe memleketterdiń úkimet basshylary EAEO-ǵa múshe memleketterdegi ǵylymı ataqtar týraly qujattardy ózara taný týraly kelisimge qol qoıdy.
— Kelisimge sáıkes EAEO-ǵa múshe memleketterdiń ýákiletti organdary bergen aǵa ǵylymı qyzmetker, dotsent, qaýymdastyrylǵan professor (dotsent) jáne professor ǵylymı ataqtary týraly qujattar ulttyq taný rásimderinen ótpeı-aq ózara tanylady.
Osylaısha, Qazaqstan Respýblıkasynda berilgen ǵylymı ataqtar týraly qujattar EAEO-ǵa múshe basqa memleketterdiń aýmaǵynda qosymsha rastaý rásimderinen ótpeı-aq tanylady. Sonymen qatar, Kelisimniń erejeleri ol kúshine engenge deıin berilgen ǵylymı ataqtar týraly qujattarǵa da qoldanylady, — delingen mınıstrlik habarlamasynda.
Kelisimdi iske asyrý EAEO ortaq eńbek naryǵy sheńberinde ǵylymı jáne ǵylymı-pedagogıkalyq qyzmetkerlerdiń eńbek qyzmetin júzege asyrýyn qamtamasyz etýge, jumysqa ornalasý kezindegi ákimshilik rásimderdi qysqartýǵa, sondaı-aq ǵylymı ataqtar týraly qujattardy tanýǵa baılanysty azamattardyń ýaqyttyq jáne qarjylyq shyǵyndaryn azaıtýǵa múmkindik beredi.
Buǵan deıin, 2024 jylǵy 2 mamyrda EAEO-ǵa múshe memleketterde ǵylymı dárejeler týraly qujattardy ózara taný týraly kelisim kúshine engenin aıta ketý kerek.
Aıta ketelik Qazaqstan EAEO-nyń biryńǵaı tsıfrlyq akkredıtteý keńistigin qalyptastyrýdy usynǵan edi.
