Qazaqstandyq ǵalymdarǵa halyqaralyq jobalarǵa qatysý múmkindigi artady
ASTANA. KAZINFORM — Brıýsselde QR Ǵylym jáne joǵary bilim mınıstri Eýropanyń jetekshi ýnıversıtettik jáne ǵylymı uıymdarynyń basshylarymen birqatar kezdesý ótkizdi.
The Guild (Eýropanyń jetekshi zertteý ýnıversıtetteriniń qaýymdastyǵy) uıymynyń Bas hatshysy ıAn Palmovskımen ótken kezdesýde qazaqstandyq joǵary oqý oryndarynyń Eýropanyń bedeldi ýnıversıtetterimen seriktestigin keńeıtý, birlesken ǵylymı jobalardy damytý, Horizon Europe baǵdarlamasy aıasynda ótinimder ázirleý jáne halyqaralyq konsortsıýmdar qurý máseleleri talqylandy.
LERU (Eýropalyq zertteý ýnıversıtetteri lıgasy) Bas hatshysy Kýrt Deketelaremen ǵylymı mektepteri qalyptasqan jáne zertteý áleýeti joǵary ýnıversıtettermen yntymaqtastyqty damytý perspektıvalary qarastyryldy. Kezdesý barysynda akademııalyq utqyrlyqty keńeıtý, dıssertatsııalyq jumystarǵa birlesip ǵylymı jetekshilik etý, sheteldik professorlardy tartý, ǵylymı mektepterdi damytý jáne qazaqstandyq ǵalymdardyń halyqaralyq zertteý jelilerine qatysýy negizgi nazarda boldy.
EUA (Eýropalyq ýnıversıtetter qaýymdastyǵy) ókili Tomas Estermanmen ýnıversıtetterdiń akademııalyq derbestigi, ǵylymdy turaqty qarjylandyrý, joǵary oqý oryndaryn basqarý júıesin jetildirý jáne olardyń halyqaralyq básekege qabilettiligin arttyrý máseleleri talqylandy.
Sondaı-aq Halyqaralyq ǵylymı-tehnıkalyq ortalyqtyń Basqarýshylar keńesindegi Eýropalyq odaqtyń ókili Marııa Roza Sabatellımen jeke kezdesý ótti. Onda Halyqaralyq ǵylymı-tehnıkalyq ortalyqtyń zertteý toptaryn qoldaý, birlesken ǵylymı jáne ınnovatsııalyq bastamalardy iske qosý, sondaı-aq Qazaqstannyń halyqaralyq ǵylymı yntymaqtastyǵyn keńeıtýge yqpal etetin tıimdi alań retindegi róli sóz boldy.
Germanııanyń Federaldyq bilim jáne ǵylymı zertteýler mınıstrliginiń ókilderimen Horizon Europe tetikteri arqyly Qazaqstan men Germanııa arasyndaǵy yntymaqtastyqty keńeıtý perspektıvalary qarastyryldy. Atap aıtqanda, birlesken ótinimder daıyndaý, halyqaralyq konsortsıýmdarǵa qatysý, ǵylym, tehnologııa jáne ınnovatsııalar salalaryndaǵy basym baǵyttar boıynsha seriktestikti damytý máseleleri talqylandy.
Ótkizilgen kezdesýler uzaq merzimdi seriktestikti nyǵaıtýǵa, qazaqstandyq ýnıversıtetterdiń eýropalyq zertteý keńistigine qatysýyn keńeıtýge jáne Qazaqstannyń Horizon Europe baǵdarlamasyna qaýymdastyrylǵan qatysýshy mártebesine qol jetkizýine yqpal etýge baǵyttalǵan.
Aıta ketelik elde jasandy ıntellekt boıynsha halyqaralyq aına zerthanasy qurylatyny týraly jazǵan edik.
