Qazaqstandyq ǵalymdardyń halyqaralyq ǵylymı bazalarǵa qoljetimdiligi artady
ASTANA.KAZINFORM - Búgin QR Ǵylym jáne joǵary bilim mınıstri Saıasat Nurbek KAIST-tiń qurmetti professory, Elsevier dırektorlar keńesiniń tóraǵasy jáne RELX Group kompanııasynyń korporatıvtik máseleler jónindegi dırektory Ensýk Chımen kezdesti.
Mınıstrliktiń baspasóz qyzmetiniń habarlaýynsha, kezdesý barysynda taraptar ǵylymı ınfraqurylymdy nyǵaıtý, qazaqstandyq ǵalymdardyń halyqaralyq ǵylymı-taldamalyq derekter bazalaryna qoljetimdiligin keńeıtý, sondaı-aq strategııalyq seriktestikti odan ári damytý perspektıvalaryn talqylady.
Mınıstr Qazaqstannyń halyqaralyq bilim berý ortalyǵy retindegi ustanymyn nyǵaıtýǵa jáne sheteldik stýdentterdi tartýǵa baǵyttalǵan júzege asyrylyp jatqan bastamalar týraly aqparat berdi. Sonymen qatar bilim berý, ǵylym jáne basqarý salalaryna jasandy ıntellekt tehnologııalaryn damytý jáne engizý maqsatynda álemniń jetekshi tehnologııalyq kompanııalarymen birlesip júzege asyrylyp jatqan jobalar tanystyryldy.
Kezdesý barysynda Alataý qalasynda jańa býyn ınjenerleri men zertteýshilerin daıarlaıtyn KAIST Kazakhstan – Koreıanyń aldyńǵy qatarly ǵylym jáne tehnologııalar ınstıtýty fılıalyn ashý jobasyna erekshe nazar aýdaryldy.
Sondaı-aq delegatsııa elimizdiń jetekshi joǵary oqý oryndarynyń qyzmetimen tanysyp, Nazarbayev University, sondaı-aq Cardiff University jáne Coventry University Qazaqstandaǵy fılıaldarynda boldy.
Kezdesý qorytyndysy boıynsha taraptar ǵylym men joǵary bilimdi tsıfrlyq transformatsııalaý baǵytyndaǵy yntymaqtastyqty odan ári damytýǵa ózara múddeliligin rastady. Oǵan qosa ǵylymı zertteýlerdiń sapasyn arttyrýǵa, ınnovatsııalyq sheshimderdi engizýge jáne ozyq halyqaralyq tájirıbeni qoldanýǵa baǵyttalǵan birlesken jumysty jalǵastyrýǵa daıyn ekenderin bildirdi.
Aıta keteıik, Memleket basshysy Qasym-Jomart Toqaev Parlament palatalarynyń birlesken otyrysynda ǵylym salasyn damytýǵa basa nazar aýdarý kerektigin aıtqan bolatyn.
