Qazaqstandyq ǵalymdar jýsan tozańyna qarsy allergııaǵa arnalǵan preparatty zerttep jatyr
ASTANA. KAZINFORM – Qazaq ulttyq agrarlyq zertteý ýnıversıteti ǵalymdary «UAǴBO» mekemesi quramynda jýsan tozańyna allergııany emdeýge arnalǵan otandyq ımmýndyq terapııalyq preparattyń II kezeńdegi klınıkalyq zertteýin bastady. Bul týraly Aýyl sharýashylyǵy mınıstrligi habarlady.
Qazaqstandaǵy maýsymdyq allergııanyń eń keń taralǵan túrleriniń biri – jýsan tozańyna allergııa. Otandyq klınıkalyq-dıagnostıkalyq zerthanalardyń málimetinshe, jýsan tozańyna sezimtaldyq barlyq tozań allergeni ishinde birinshi orynda tur, ıaǵnı 30%. Ásirese Almaty qalasy úshin ózekti. Sebebi munda jýsannyń gúldeý kezeńi shildeden qarashaǵa deıin jalǵasady. Osy ýaqytta myńdaǵan adam murynnyń bitelýi, túshkirý, kózden jas aǵý jáne ómir sapasynyń tómendeýi jaǵdaılaryna tap bolady.
Qoldanystaǵy emdeý tásilderi negizinen aýrý belgilerin ýaqytsha jeńildetýge baǵyttalǵan, derttiń negizgi sebebin tolyq joımaıdy. Al dástúrli allergen-spetsıfıkalyq ımmýnoterapııa birneshe jyl boıy uzaq em qabyldaýdy ári preparattardy birneshe márte engizýdi talap etedi.
Qazaqstannyń Densaýlyq saqtaý mınıstrligi ǵylymı-tehnıkalyq baǵdarlamasy aıasynda ǵalymdar PollenVax atty jańa otandyq preparatty ázirledi. Preparat OtarBioPharm bazasynda halyqaralyq GMP standartyna sáıkes óndirilip jatyr.
Bul jýsan tozańy allergeniniń rekombınantty aqýyzy negizinde jasalǵan. Onyń basty ereksheligi — emdeý kýrsynyń edáýir qysqartylýy. Terapııa aptasyna bir ret jasalatyn tórt teriasty ınektsııasynan turady.
Buǵan deıin 30 eriktiniń qatysýymen klınıkalyq zertteýdiń I kezeńi sátti aıaqtaldy. Zertteý nátıjesinde preparattyń qaýipsizdigi dáleldenip, adam aǵzasyna jaqsy qabyldanatyny anyqtaldy. Sondaı-aq allergendi beıtaraptandyratyn antıdenelerdiń túzilýi jáne terilik prık-test nátıjeleri boıynsha allergenge sezimtaldyqtyń tómendeýi sekildi oń ımmýnologııalyq kórsetkishter tirkeldi.
Qazirgi tańda II kezeńdegi klınıkalyq zertteýdi ótkizýge resmı ruqsat berildi.
Atalǵan zertteý — jýsan tozańynan týyndaǵan allergııalyq rınıti rastalǵan, jasy 18 ben 65 jas aralyǵyndaǵy 138 patsıenttiń qatysýymen júrgiziletin randomızatsııalanǵan, qos soqyr, platsebo-baqylanatyn klınıkalyq synaq.
Zertteýge qatysý merzimi 180 kúnge deıin sozylady.
Bul jobanyń júzege asyrylýy otandyq bıofarmatsevtıkanyń damýyna serpin beretin mańyzdy qadam sanalady. Sonymen qatar densaýlyq saqtaý salasyndaǵy ózekti máselelerdi sheshýge baǵyttalǵan zamanaýı ınnovatsııalyq preparattardy ázirleýdegi qazaqstandyq ǵylymnyń áleýetin aıqyn kórsetedi.
Almatylyqtar arasyndaǵy allergııanyń negizgi sebebi atalǵanyn jazǵan edik.
