Qazaqstandyq ǵalymdar Vatıkan arhıvindegi materıaldarmen tanysady
ASTANA. KAZINFORM – Qazaqstandyq ǵalymdar Vatıkandaǵy Apostol kitaphanasynyń muraǵatyna baryp, buryn qoljetimsiz bolǵan materıaldarmen tanysady. Bul týraly Ǵylym jáne joǵary bilim mınıstri Saıasat Nurbek málim etti.
Mınıstrdiń aıtýynsha, úsh jyl buryn Qazaqstannyń Shyǵystaný ınstıtýty men Vatıkan kitaphanasy arasynda kelisimge qol qoıyldy.
«Bıyl bizdiń ǵalymdardyń birinshi toby Rımge baryp, alǵash ret Apostol kitaphanasynyń jabyq muraǵatyna ruqsat alady. Bul 10 ǵasyrdan bastap bizdiń aımaqtarǵa kelgen ıezýıtter men domınıkandyqtardyń mıssııalary týraly esepter. Olar arnaıy mnemotehnıka boıynsha oqytylǵan jáne aılar boıy kórgen-bilgenin muqııat jazyp otyrǵan. Bizdiń ǵalymdarǵa buryn jabyq bolǵan derekkózdermen tanysýǵa múmkindik beriledi, jańa tarıhı faktiler de ashylýy múmkin. Bul týraly qosymsha habarlaımyz», - dedi Saıasat Nurbek Ortalyq Azııa memleketteri tarıhshylarynyń I forýmynda.
Buǵan deıin de qazaq ǵalymdary Vatıkan kitaphanasyndaǵy túrki tarıhyna qatysty qoljazbalardy zertteýge múmkindik alatyny habarlanǵan edi.
Aıta keteıik, Eýrazııa ulttyq ýnıversıtetinde «Ortalyq Azııa tarıhy: halyqtar men mádenıetter arasyndaǵy dıalog» atty Ortalyq Azııa memleketteri tarıhshylarynyń І forýmy ótti.
Forýmǵa Qazaqstan, Qyrǵyzstan, Ózbekstan, Tájikstan, Túrkimenstan ǵalymdary, sondaı-aq memleket jáne qoǵam qaıratkerleri keldi.
