Otandyq ǵalymdar suńqar genomyn zertteýge atsalysty
ASTANA. KAZINFORM — Qozybaev ýnıversıtetiniń zertteýshileri Amerıkandyq genetıkalyq qoǵam shyǵaratyn bedeldi G3: Genes, Genomes, Genetics jýrnalynda jarııalanǵan iri serpindi genomdyq jobaǵa eleýli úles qosty, dep habarlaıdy Ǵylym komıtetiniń baspasóz qyzmeti.
«Saýd Arabııasynyń eki jyrtqysh qusynyń genomdyq resýrstary: Falco biarmicus jáne Falco peregrinus» atty zertteý eki suńqar túrine arnalǵan joǵary sapaly hromosomalyq deńgeıdegi genomdyq jınaqtardy usynady. Bul bıoártúrlilik, evolıýtsııa jáne tabıǵatty qorǵaý genomıkasy salasyndaǵy ǵylymı zertteýler úshin jańa múmkindikter ashady. Jobany Qazaqstan, Amerıka Qurama Shtattary jáne Saýd Arabııasynyń jetekshi JOO ǵalymdary birlesip júzege asyrdy.
Qozybaev ýnıversıtetiniń Halyqaralyq kampýsyndaǵy professor, jobanyń alǵashqy avtory Andrea Zýkkolo zertteýde jetekshi ǵylymı ról atqardy. Ǵylymı top quramynda Arızona ýnıversıteti men KAUST ýnıversıtetiniń álemge áıgili genomıst-ǵalym Rod Vıng, Korol Saýd atyndaǵy ýnıversıtetiniń professory Abdýlvahed Fahad Alrefaı jáne Qozybaev ýnıversıtetiniń Agroquzyrettilik ortalyǵynyń daqyldardy óndirý jónindegi ǵylymı úılestirýshisi doktor Sáýle Mýsýrova bar.
— Qazaqstandyq ǵalymdardyń bul jobaǵa qatysýy Qozybaev ýnıversıtetiniń genomıka jáne bıoınformatıka salasyndaǵy zertteýleriniń jahandyq deńgeıde damyp kele jatqanyn, sondaı-aq ýnıversıtettiń álemdik ǵylymı jelilerge tabysty ıntegratsııalanǵanyn kórsetedi, — delingen komıtet taratqan aqparatta.
Qazirgi ýaqytta professor Andrea Zýkkolo Qozybaev ýnıversıtetiniń taǵy bir jobasy — «Ulttyq qazyna genomıkasy» aıasynda sırek kezdesetin janýarlardy zertteý baǵytynda jumys isteıdi. Ol genomdyq zertteý salasyndaǵy tájirıbesin paıdalanyp, University of Leeds (Ulybrıtanııa) jáne Kaspıı ıtbalyqtaryn zertteý jáne ońaltý ortalyǵymen (Qazaqstan) birlesip, álemde alǵash ret Kaspıı ıtbalyǵynyń genomyn qurastyrý jobasyn júzege asyryp jatyr.
Zertteý joıylyp bara jatqan túrdi saqtap qalýǵa jáne halyqtyń genetıkalyq densaýlyǵyn zertteýge baǵyttalǵan.
Osyǵan deıin otandyq ǵalymdardyń ázirlemeleri negizinde jańa zaýyt iske qosylǵanyn jazǵanbyz.