Qazaqstandyq ǵalymdar seısmıkalyq qaýipsizdikke arnalǵan otandyq tehnologııany synap jatyr

ASTANA.KAZINFORM - Sátbaev ýnıversıtetiniń ǵalymdary ǵımarattar men ınjenerlik qurylystardyń seısmıkalyq tózimdiligin arttyrýǵa baǵyttalǵan belsendi túrde basqarylatyn vıbroplatformany ázirledi.

QR Ǵylym jáne joǵary bilim mınıstrligi baspasóz qyzmetiniń habarlaýynsha, seısmıkalyq qaýiptiligi joǵary aımaqtarda ornalasqan qalalar úshin bul joba praktıkalyq mańyzǵa ıe.

Ǵylymı ázirleme paralleldi manıpýlıatorlardy belsendi seısmıkalyq qorǵaý júıelerinde qoldaný qaǵıdatyna negizdelgen. Usynylyp otyrǵan tehnologııa jer silkinisi kezinde avtomatty túrde iske qosylyp, qurylymǵa áser etetin terbelisterdi naqty ýaqyt rejıminde anyqtap, olardyń áserin dınamıkalyq túrde óteıdi.

Joba jetekshisi, PhD, qaýymdastyrylǵan professor Qýanysh Abjaparovtyń aıtýynsha, «dástúrli passıvti seısmıkalyq qorǵaý ádisterinen aıyrmashylyǵy – bul júıe syrtqy áserlerge jedel jaýap berip, topyraq qozǵalysyn belsendi túrde teńestirýge múmkindik beredi».

Joba aıasynda vıbroplatformanyń eksperımenttik úlgisi ázirlenip, birqatar synaqtan ótkizildi. Zertteý jumystaryna «Avtomattandyrý jáne robototehnıka» bilim berý baǵdarlamasy boıynsha bilim alyp jatqan magıstranttar Erjan Jumabekuly men Maqsat Amangeldi belsendi túrde qatysady. Alynǵan nátıjeler ázirlengen tehnologııanyń tıimdiligin jáne ony tájirıbede qoldaný áleýetiniń joǵary ekenin kórsetti.

- Qazirgi tańda joba granttyq qarjylandyrý konkýrsyna usynylǵan. Aldaǵy kezeńde júıeni aýqymdy synaqtardan ótkizý jáne ony tájirıbelik qoldanysqa alǵash ret engizý josparlanyp otyr, - delingen habarlamada.

Osyǵan deıin Ulttyq ǵylym akademııasy ǵylymı-tehnıkalyq forsaıt ortalyǵyn qurýǵa mindettelgeni týraly habarladyq.