Qazaqstandyq ǵalymdar Nobel syılyǵyna talasatyn jobaǵa 10 mln dollar izdep júr

ASTANA. KAZINFORM – «ıAdrolyq fızıka ınstıtýty» respýblıkalyq memlekettik kásipornynyń bas dırektory Saıabek Sahıev Senatta ótken kezdesýde Nobel syılyǵyna talasatyn jobaǵa 10 mln dollar tappaı otyrǵandaryn málim etti.

- Bizdegi ǵylymı jobalardy qoldaý tizbesinde MegaScience sanatyndaǵy jobalar múlde joq. Osyny engizsek... Álemdik deńgeıdegi alǵashqy MegaScience jobasyn usynǵanymyzǵa úsh jyldan asyp bara jatyr. Bul – ýltrasalqyn neıtrondar kózin jasaýǵa arnalǵan joba. Osy joba arqyly kem degende eki Nobel syılyǵyna tatıtyn jańalyq ashýǵa bolady. Bir jańalyǵymyz Nobel syılyǵyna saı ekenine senimdimiz. Biraq oǵan qajetti qondyrǵyny ornatý úshin 15 mln dollar kerek, - deıdi ol.

Aıtýynsha, atalǵan qondyrǵy Qazaqstanda ornatylsa, keıin álemdegi eń jetekshi degen 15 joǵary oqý ornynyń ǵalymdary sonda kelip eksperıment jasaıdy.

- Biraq bizde ondaı qarjy bólýge negiz bolatyn MegaScience baǵdarlama atymen joq. Álemniń 27 eli múshe bolyp kiretin Birikken zertteýler ıadrolyq ınstıtýty 5 mln dollardy berýge daıyn otyr. Qalǵan 10 mln dollardy bólýge qoldaý kórsetseńizder degen ótinish bar. Bar-joǵy 5 mlrd teńgeni bólse, aınaldyrǵan 3 jyldyń ishinde álemdik deńgeıdegi úlken jańalyq ashatyn ortalyq qurar edik, - dedi Saıabek Sahıev.

Úsh jyldyq qarjylandyrý degen az. 5-10 jyldyń kóleminde úzdiksiz qarjylandyrylatyn baǵdarlama kerek. Óıtkeni búgin 100 mln teńge turatyn qondyrǵy 2 jyldan keıin qansha turatynyn bir Qudaı biledi.

Sondaı-aq, ol ınstıtýttyń AES qaldyqtaryn óńdeıtin jobasyn Túrkııa patenttep alýy múmkin ekenin málim etti.