Qazaqstandyq ǵalymdar mármár qoı etin óndirý tehnologııasyn ázirledi
ASTANA. KAZINFORM — «Ulttyq agrarlyq ǵylymı-bilim berý ortalyǵy» KEAQ quramyndaǵy «Qazaq qaıta óńdeý jáne tamaq ónerkásibi ǵylymı-zertteý ınstıtýty» JShS ǵalymdary qazaqtyń bııazy júndi qoı tuqymy negizinde mármár qoı etin óndirýdiń keshendi tehnologııasyn ázirledi. Bul týraly AShM málim etti.
Jańa tehnologııa tutynýshylyq qasıetteri joǵary, sapaly ári eksporttyq áleýeti bar qozy etin óndirýge múmkindik beredi.
— Tehnologııa qozylardy qarqyndy ósirý jáne bordaqylaýdyń ǵylymı negizdelgen júıesin qamtıdy. Sonymen qatar ǵalymdar dándi jáne aqýyzdy komponentter, probıotıkter, ósimdik tektes qospalar, premıkster men mıneraldy zattardan turatyn teńgerimdi quramajem ázirledi. Mundaı azyqtandyrý maldyń táýliktik ortasha salmaq qosýyn arttyryp, zat almasý úderisteriniń turaqty júrýin qamtamasyz etedi jáne bulshyqet ishindegi maıdyń birkelki jınalýyna yqpal etedi, — delingen habarlamada.
Zertteý nátıjesinde qazaqtyń bııazy júndi qoı tuqymynyń genetıkalyq áleýetin tolyq iske asyrýǵa múmkindik týdy. Qozy etindegi bulshyqet ishindegi maıdyń mólsheri 4–6%-ǵa jetti. Al dástúrli jaıylymdyq jaǵdaıda ósirilgen malda bul kórsetkish shamamen 2–3%-dy quraıdy. Bul ettiń mármárliligin arttyryp, onyń shyryndylyǵy men jumsaqtyǵyn jaqsartyp, dámin qanyqtyra tústi.
Sonymen qatar maldyń soıys kórsetkishteri de jaqsardy. Atap aıtqanda, eń qundy et bólikteriniń shyǵymy artty, bulshyqet pen maı ulpalarynyń araqatynasy ońtaılandy. Sonyń nátıjesinde ónimniń taýarlyq qundylyǵy artyp, ony syrtqy naryqtarǵa shyǵarýǵa jańa múmkindikter ashylady.
— Ázirlengen tehnologııa qozylardy ósirý men bordaqylaýdyń barlyq kezeńin ońtaılandyrýdy kózdeıdi. Ǵalymdar usynǵan quramajemniń quramyndaǵy dándi jáne aqýyzdy komponentter, probıotıkter, ósimdik tektes qospalar, premıkster men mıneraldy zattar maldyń qarqyndy ósýine, zat almasý úderisteriniń turaqty júrýine jáne ette mármárli qurylymnyń qalyptasýyna jaǵdaı jasaıdy, — dep habarlady vedomstvodan.
Alynǵan mármár qoı eti eksportqa shyǵarylatyn ónimge qoıylatyn sapa men qaýipsizdik talaptaryna saı keledi. Tehnologııany joǵary sapaly et óndirýge baǵyttalǵan Qazaqstandaǵy qoı sharýashylyǵy kásiporyndaryna engizýge bolady.
Ázirlemeniń ǵylymı mańyzdylyǵy paıdaly modelge berilgen eki patentpen rastaldy. Zertteý nátıjeleri ǵylymı basylymdarda da jarııalanǵan.
Jańa tehnologııany óndiriske engizý etti qoı sharýashylyǵyn damytýǵa, qosylǵan quny joǵary ónim kólemin arttyrýǵa jáne Qazaqstannyń eksporttyq áleýetin nyǵaıtýǵa yqpal etedi.
Eske sala keteıik, buǵan deıin Premer-mınıstr asyl tuqymdy mal basyn satyp alý jumysyn jedeldetýdi tapsyrǵan bolatyn.
