Qazaqstandyq ǵalymdar qurǵaqshylyqqa tózimdi jańa sorttardy patenttedi
ASTANA. KAZINFORM — Bıyl A. I. Baraev atyndaǵy astyq sharýashylyǵy ǵylymı-óndiristik ortalyǵy agrarlyq saladaǵy jańa selektsııalyq jetistikter men tehnologııalyq sheshimderge birqatar patent rásimdedi. Bul ázirlemeler qurǵaq klımat jaǵdaıynda ósimdik sharýashylyǵynyń turaqtylyǵyn arttyrýǵa jáne óndiris tıimdiligin kóterýge baǵyttalǵan. Bul týraly AShM málim etti.
— Jańa sorttardyń qatarynda jalań dándi «Damsınskıı» sulysy, jazdyq qatty «Torǵaı» bıdaıy, mal azyqtyq «Izýmrýdnoe» tarysy jáne taǵamdyq «Renome» tarysy bar. Olardyń barlyǵy Qazaqstannyń klımattyq erekshelikterin eskere otyryp shyǵarylǵan jáne qurǵaqshylyqqa tózimdiligimen, jatyp qalýǵa qarsy beriktigimen ári turaqty ónimdiligimen erekshelenedi, — delingen habarlamada.
Ázirleýshilerdiń málimetinshe, bul sorttardy engizý agrotehnologııalar men aýa raıy jaǵdaıyna baılanysty ónimdilikti 2–10 ts/ga deıin arttyrýǵa múmkindik beredi.
Budan bólek, maıly zyǵyrdy ósirý tásili de patentteldi. Bul tehnologııada aldyńǵy daqyldyń egistigin jınaýǵa deıin gerbıtsıdtik óńdeý qarastyrylǵan. Mundaı tásil egistiktegi aramshópterdiń mólsherin azaıtyp, keıingi daqyldyń ónimdiligin arttyrýǵa jáne ósimdikterdi qorǵaý shyǵyndaryn ońtaılandyrýǵa jol ashady.
— Ázirlemeler Soltústik jáne Soltústik-Shyǵys Qazaqstan jaǵdaıynda qoldanýǵa baǵyttalǵan, bul aımaqtar táýekeldi eginshilik aımaǵyna jatady. Olardy engizý agrarshylarǵa óndiristiń turaqtylyǵyn arttyrýǵa, klımattyq táýekelderdi azaıtýǵa jáne sharýashylyqtardyń ekonomıkalyq kórsetkishterin jaqsartýǵa kómektesedi, — dep habarlady vedomstvodan.
Aıta keteıik, buǵan deıin Qazaqstan ǵalymdary 3 jylda 81 halyqaralyq patent alǵanyn jaǵan edik.
