Qazaqstandyq ǵalymdar kremnıı qaldyqtaryn qaıta óńdeýdiń jańa tehnologııasyn synady
ASTANA. KAZINFORM – Qazaqstandyq ǵalymdar kremnıı óndirisindegi qaldyqtardy qaıta óńdeýge jáne olardy qaıta paıdalanýǵa múmkindik beretin tıimdi tehnologııany synaqtan ótkizdi.
Qaraǵandy ındýstrııalyq ýnıversıtetiniń «Metallýrgııa» oqý-ǵylymı-zertteý ortalyǵynda kondıtsııaǵa saı kelmeıtin shıkizat pen metallýrgııalyq qaldyqtardy qaıta óńdeý arqyly kremnııquramdy qorytpalardy óndirýge arnalǵan zertteýler júrgizilip jatyr.
Zerthanalyq synaqtar qýattylyǵy 250 kVA ken-termııalyq elektr peshinde júzege asyrylýda.
Zertteýdiń negizgi maqsaty – kremnıı qorytpalaryn óndirý kezinde paıda bolatyn mıkrokremnezem men kómirtekti totyqsyzdandyrǵyshtardyń usaq fraktsııalaryn paıdalanyp, krıstaldyq kremnıı men ferrosılıtsııdi balqytý tehnologııasynyń tıimdiligin anyqtaý.
– Zertteý nátıjeleri ekinshi rettik materıaldyq resýrstardy óndiristik aınalymǵa tıimdi engizýge jáne tabıǵı shıkizatty utymdy paıdalanýǵa múmkindik bar ekenin kórsetti. Usynylǵan tehnologııa metallýrgııalyq qaldyqtar kólemin azaıtyp, qorshaǵan ortaǵa túsetin ekologııalyq júktemeni tómendetýge jáne óndiris shyǵyndaryn qysqartýǵa yqpal etedi, – dep habarlady Ǵylym jáne joǵary bilim mınıstrliginen.
Ǵylymı jumystar barysynda mıkrokremnezem men kómirtekti totyqsyzdandyrǵyshtyń usaq fraktsııalary negizinde daıyndalǵan brıkettelgen qospany paıdalaný arqyly tehnıkalyq kremnııdi balqytý tehnologııasy da synaqtan ótkizildi.
Nátıjesinde tehnogendik qaldyqtardy óndiris protsesine qaıta engizýge bolatyny dáleldendi. Ǵalymdardyń aıtýynsha, alynǵan nátıjeler ázirlengen tehnologııany ónerkásiptik óndiriske engizýdiń áleýeti joǵary ekenin kórsetedi.
Sondaı-aq zertteý aıasynda Aqtas ken ornynyń kvarts resýrstaryn saqtaý jáne tıimdi paıdalaný máselesi qarastyryldy. Mamandar kvarts shıkizatyn óńdeý kezindegi shyǵyndardy azaıtýǵa arnalǵan usynymdar ázirledi.
– Júrgizilgen ǵylymı zertteýler resýrs únemdeıtin tehnologııalardy damytýǵa, mıneraldyq-shıkizat resýrstaryn paıdalaný tıimdiligin arttyrýǵa jáne metallýrgııa óndirisinde qaldyqsyz óndiris qaǵıdattaryn engizýge baǵyttalǵan, – dep atap ótti Qaraǵandy ındýstrııalyq ýnıversıtetinen.
Aıta keteıik, ǵalymdar qan ketýdi lezde toqtatatyn untaq oılap shyǵardy.
