Qazaqstandyq ǵalymdar Keńgir sý qoımasyn tazartý jobasyn ázirlep jatyr
ASTANA. KAZINFORM – Sý resýrstary jáne ırrıgatsııa mınıstrligine qarasty Sý resýrstarynyń aqparattyq-taldaý ortalyǵynyń, Nazarbaev Ýnıversıtetiniń, L.N.Gýmılev atyndaǵy Eýrazııa ulttyq ýnıversıtetiniń jáne «Respýblıkalyq mıkroorganızmder kollektsııasy» RMK mamandary Keńgir sý qoımasynyń sý sapasyn bıologııalyq jáne bıotehnologııalyq ádistermen jaqsartý boıynsha pılottyq joba ázirlep jatyr.
Joba boıynsha sý qoımasyn baqylaý jáne tazartý úshin tabıǵı jáne ekologııalyq turǵydan qaýipsiz materıaldardy qoldana otyryp, zamanaýı tehnologııalardy ázirlep, engizý kózdelgen. Bul sharalar ekologııalyq qaýipsizdikti qamtamasyz etýge, sý sapasyn qalpyna keltirýge jáne sý aıdynyndaǵy bıologııalyq ártúrlilikti arttyrýǵa baǵyttalǵan.
Josparlanǵan is-sharalarǵa zamanaýı qural-jabdyqtardy paıdalana otyryp, sý qoımasynyń jaǵdaıyna dıagnostıka júrgizý, ýly lastaýshylardy tazartý jáne beıtaraptandyrý úshin tabıǵı nemese sıntezdelgen adsorbentterdi qoldaný, sý qoımasy úshin tıimdi bakterııa shtammdaryn tańdaý jáne engizý, toǵan balyqtaryn jiberý, ózenderdiń saǵalarynda súzgileý aımaqtaryn qurý, sý temperatýrasyn, ottegi men sýtegi deńgeıin baqylaý úshin datchıkter ornatý, aı saıyn zerthanalyq taldaý úshin sý synamalaryn alý jatady.
Sý resýrstary jáne ırrıgatsııa mınıstrligi málimetinshe, pılottyq jobany júzege asyrý merzimi – 2 jyl. Barlyq qajetti jumysty 2026-2027 jyldary aıaqtaý josparlanyp otyr.
– Buǵan deıin Keńgir sý qoımasynda mundaı zertteýler men jobalar júrgizilmegen. Bul nysan Jezqazǵan qalasy men oǵan irgeles aýdandardy sýmen qamtamasyz etýde strategııalyq mańyzǵa ıe, sondaı-aq aımaqtyń florasy men faýnasy úshin mańyzdy mekendeý orny sanalady. Qazaqstandyq ǵalymdar ázirlep jatqan joba Ortalyq Qazaqstan úshin biregeı sý qoımasyn qalpyna keltirýge arnalǵan ǵylymı jáne praktıkalyq negizdi qalyptastyrady. Onda sýdy bıotehnologııalyq, hımııalyq jáne ınjenerlik tásildermen, ekologııaǵa zııan keltirmeı tazartý kózdelgen, – dedi Sý resýrstary jáne ırrıgatsııa mınıstrliginiń Ǵylymı jáne ınnovatsııalyq tehnologııalar departamentiniń dırektory Lázzat Júsipova.
Keńgir sý qoımasy – Ulytaý oblysyndaǵy eń iri sý qoımasy. Onyń kólemi – 319 mln tekshe metr.
Bıyl naýryz aıynda Úkimet qaýlysymen nysan memleket menshigine qabyldandy.
Aıta keteıik, Abaı oblysynda jańa sý qoımasynyń qurylysy bastalady.