Qazaqstandyq ǵalymdar ımmýnıtetti nyǵaıtatyn bıologııalyq qospa ázirlep jatyr
ASTANA. KAZINFORM - «Qazaq qaıta óńdeý jáne taǵam ónerkásipteri ǵylymı-zertteý ınstıtýtynyń» ǵalymdary ımmýnomodýlıatsııalyq baǵyttaǵy jańa otandyq bıologııalyq belsendi qospany (BBQ) ázirleý ústinde.
QR Aýyl sharýashylyǵy mınıstrligi baspasóz qyzmetiniń habarlaýynsha, joba fýnktsıonaldy taǵam ónimderine suranystyń artýyna jaýap beredi jáne ımmýndyq júıeni qoldaýǵa, sondaı-aq kómirsý almasýynyń kórsetkishterin jaqsartýǵa baǵyttalǵan.
Jańa BBQ tek tabıǵı ósimdik tektes shıkizat negizinde jasalyp jatyr.
Ónimniń quramyna ǵylymı turǵydan negizdelgen qasıetteri bar topınambýr - ınýlınniń tabıǵı kózi, óngen suly men arpa — β-glıýkandar men dárýmenderge baı, mııa tamyry — qabynýǵa qarsy áleýetti qospalar engizilgen.
Ingredıentterdiń bul úılesimi ratsıondaǵy kókónis pen jemis-jıdek tapshylyǵyn ishinara tolyqtyrýǵa múmkindik beredi. Sondaı-aq aǵzany makro jáne mıkroelementtermen (kaltsıı, magnıı, kalıı, temir, myrysh) ári almastyrylatyn jáne almastyrylmaıtyn amınqyshqyldarymen qamtamasyz etedi.
Ǵalymdardyń aıtýynsha, BBQ ımmýnıtetti jumsaq túrde modýlıatsııalaý jáne aǵzanyń qorǵanys kúshin nyǵaıtý, kómirsý almasýyn qoldaý, bul ónimdi qant dıabeti jáne metabolızm buzylystary kezinde ózekti etý, prebıotıkterdiń joǵary mólsheri esebinen ishek mıkroflorasyn qalypqa keltirý sııaqty birqatar máseleni bir ýaqytta sheshedi.
Jobanyń erekshelikteriniń biri — qoldaný aıasynyń ámbebaptyǵy. Ǵalymdar kapsýla túrinde qabyldaý úshin kúnine 3 kapsýla ońtaıly doza dep esepteıdi. Ol ınýlınniń táýliktik qajettiliginiń 3,2%-yn qamtamasyz etedi.
Qazirgi tańda jańa BBQ úlgileri zerthanalyq synaqtardyń negizgi kezeńderinen ótti. Atap aıtqanda, fızıka-hımııalyq taldaý ylǵaldylyq, fermentter belsendiligi kórsetkishteriniń normatıvterge sáıkestigin jáne ınýlın mólsheriniń turaqtylyǵyn rastady. Sonymen qatar mıkrobıologııalyq baqylaý ónimniń qaýipsiz ekenin jáne patogendi mıkroorganızmderdiń joqtyǵyn dáleldedi.
Bıyl ǵylymı-zertteý jumystarynyń qorytyndy kezeńi. Kelesi jyly joba aýqymdylyǵyn arttyryp, naryqqa shyǵarý jáne ónerkásiptik óndiristi iske qosý josparlanyp otyr. Bolashaqta jańa BBQ jáne onyń qosylǵan fýnktsıonaldy taǵam ónimderi elimizdiń dárihanalary men paıdaly taǵam dúkenderinde qoljetimdi bolady dep kútilip otyr.
Osyǵan deıin ǵalymdardyń aýyl sharýashylyǵyna arnalǵan jańa bıotyńaıtqysh tehnologııasyn usynǵany týraly jazdyq.