Qazaqstandyq ǵalymdar hrızotıl-asbest qaldyqtaryn qaıta óńdeý tehnologııasyn ázirledi
ASTANA. KAZINFORM - «Qazaqstan Respýblıkasy Mıneraldyq shıkizatty keshendi óńdeý jónindegi ulttyq ortalyǵy» RMK ǵalymdary «Qostanaı mıneraldary» AQ kásipornymen birlesip hrızotıl-asbest qaldyqtaryn qaıta óńdeý tehnologııasyn ázirledi.
QR Ónerkásip jáne qurylys mınıstrligi baspasóz qyzmetiniń málimetinshe, joba «Ǵylym qory» AQ-nyń (№ 0253-17-MK «Hrızotıl-asbest tehnogendik shıkizatynan bıshofıt óndirýdi uıymdastyrý») granttyq qarjylandyrýy arqyly ǵylymı jáne ǵylymı-tehnıkalyq qyzmet nátıjelerin kommertsııalandyrý jobasy sheńberinde júzege asyryldy.
Sonymen jobany iske asyrý barysynda patenttelgen tájirıbelik-ónerkásiptik qondyrǵy iske qosylyp, ony óndiriste qoldaný faktisi tıisti aktimen rastaldy. Ázirlengen tehnologııa qosylǵan quny joǵary ónim alýǵa baǵyttalǵan.
Atalǵan shıkizattan bıshofıtten (MgCl₂•6H₂O) bólek, joǵary tazalyqtaǵy sıntetıkalyq karnallıt (KCl•MgCl₂•6H₂O) alyndy. Bul ónim «Óskemen tıtan-magnıı kombınaty» AQ-da magnııdi elektrolıttik jolmen óndirý úshin mańyzdy shıkizat sanalady. Muny kásiporyn qazirgi ýaqytta shetelden satyp alady.
Osylaısha, atalǵan tehnologııa óndiriske sátti engizilse, elimizdiń magnıı ónerkásibi úshin ımportqa táýeldiligin tómendetý múmkindigi paıda bolmaq.
Osyǵan deıin qazaqstandyq ǵalymdardyń keıingi kezde ashqan jańalyqtary týraly materıal jaııaladyq.
