Qazaqstandyq ǵalymdar Garvard ýnıversıtetinde qoljazbalarmen jumys isteý ádisterin zerttedi
ASTANA. KAZINFORM – «Qazaqstannyń qoljazba murasy: reestrleý, restavratsııalaý, ǵylymı katalogtaý, tsıfrlandyrý jáne keshendi kodıkologııalyq zertteý» jobasy aıasynda qazaqstandyq ǵalymdar delegatsııasy AQSh-tyń Boston qalasyndaǵy Garvard ýnıversıtetine ǵylymı issaparmen bardy. Bul týraly Ǵylym jáne joǵary bilim mınıstrliginiń baspasóz qyzmeti habarlady.
Ondaǵy negizgi maqsat – Qazaqstannyń tarıhı qoljazbalaryn reestrleý, ǵylymı katalogtaý jáne tsıfrlandyrý boıynsha álemdik tájirıbeni zerdeleý, sondaı-aq Garvard ýnıversıtetiniń jáne Devıs ortalyǵy ǵalymdarymen tyǵyz baılanys ornatý, jetekshi sarapshylarmen pikir almasý jáne ǵylymı máselelerdi talqylaý, ortaq ǵylymı is-sharalar uıymdastyrý máselesin talqylaý.
Ǵalymdar Garvardtyń Devıs ortalyǵy men Hoýton, Vaıdener kitaphanalarynyń mamandarymen kezdesip, sırek qoljazbalar qorymen, katalogtaý jáne tsıfrlandyrýdyń zamanaýı tásilderimen tanysty. HOLLIS júıesi arqyly Ortalyq Azııaǵa qatysty ıslam derekkózderiniń bazasymen jumys júrgizdi.
Kezdesýler barysynda birlesken semınarlar, vorkshoptar, ǵylymı jobalar jáne shaǵataı tilin oqytý baǵytynda jańa seriktestik, Qazaqstanǵa Garvard ǵalymdarynyń saparyn uıymdastyrý múmkindikteri talqylandy.
Sonymen qatar Garvard ǵalymdary ǵylymı joba aıasynda shaǵataı tiliniń onlaın sózdigin ázirleý týraly bastamany usyndy. Bul halyqaralyq deńgeıdegi biregeı ǵylymı ónim bolmaq.
Іssapar Qazaqstan ǵalymdaryna sırek qoljazbalarmen jumys isteýdiń zamanaýı ádisterin meńgerýge, halyqaralyq ǵylymı jelini keńeıtýge jáne joba nátıjelerin jańa deńgeıde iske asyrýǵa múmkindik berdi.
Eske salsaq, osyǵan deıin ǵalymdar Baıanaýyldaǵy balbaltastardyń tsıfrlyq kóshirmelerin jasaýǵa kiriskenin jazǵan edik.