Qazaqstandyq ǵalymdar FIGO kongresinde zertteý nátıjelerin usyndy
ASTANA. KAZINFORM — Akýsherlik jáne gınekologııa salasyndaǵy qazaqstandyq mamandar Ońtústik Afrıka Respýblıkasynyń Keıptaýn qalasynda ótip jatqan XXV Dúnıejúzilik FIGO kongresine qatysty. Bul týraly QR Densaýlyq saqtaý mınıstrligi habarlady.
Bul sharaǵa álemniń túkpir-túkpirinen 5 myńnan asa delegat jınaldy.
Gınekologııa jáne akýsherlik boıynsha halyqaralyq federatsııa kongresine qazaqstandyq ǵalymdar platsentanyń jatyr qabyrǵasyna tyǵyz bekýi men tamyrlanyp ósýi nátıjesinde qan ketý jaǵdaılarynda qoldanylatyn REBOA (aortaǵa ballon arqyly reanımatsııalyq endovaskýlıarlyq okklıýzııa jasaý) tehnologııasyn qoldanýǵa qatysty zertteý nátıjelerin usyndy.
Qazaqstandyq komanda REBOA tehnologııasyn qoldaný arqyly qan joǵaltýdy 31,6% azaıtyp, operatsııa kezinde qan quıý kólemin orta eseppen 1700 ml-ge qysqartýǵa jáne naýqastardyń 70,4%-y reprodýktıvtik fýnktsııany saqtaýǵa bolatynyn kórsetti. Bul tehnologııany engizý aǵzany saqtap qalý maqsatyndaǵy operatsııalardy júrgizýge jáne aýyr akýsherlik qan ketýlerge baılanysty asqynýlardyń qaýpin aıtarlyqtaı tómendetýge múmkindik beredi.
FIGO Dúnıejúzilik kongresi — reprodýktıvti densaýlyq salasyndaǵy eń aýqymdy halyqaralyq is-sharalardyń biri, ol dárigerlerdi, ǵalymdardy, akýsherlerdi jáne ózge de sala mamandaryn biriktiredi.
— Bıylǵy kongrestiń basty taqyryby — bosanǵannan keıingi qan ketýlerge qarsy kúres boldy. Bul — ana óliminiń álemdegi jetekshi sebepteriniń biri. FIGO uıymynyń prezıdenti, professor Ann-Beatrıs Kıhara qazirgi ýaqytqa deıingi jetistikterge qaramastan, ana ólim-jitim kórsetkishi áli de joǵary ekenin, ıaǵnı 100 000 tiri týǵan nárestege shaqqanda 223 jaǵdaı tirkeletinin atap ótti. Kongress aıasynda 5 qazan kúnin bosanǵannan keıingi qan ketýlerge qarsy kúrestiń Dúnıejúzilik kúni (World Postpartum Hemorrhage Day) retinde bekitý týraly usynys aıtyldy, — dep jazdy vedomstvo.
Forýmnyń ǵylymı baǵdarlamasy ana men náreste densaýlyǵynan bastap, jynystyq jáne reprodýktıvtik densaýlyq pen quqyqtar, sondaı-aq onkogınekologııa salasyna deıingi keń aýqymdy taqyryptardy qamtydy.
Aıta keteıik, buǵan deıin Premer-mınıstr Oljas Bektenov elimizde qabyldanǵan sharalar ana men bala ólimi kórsetkishin tómendetýge múmkindik bergenin aıtty.