Qazaqstandyq ǵalymdar energııa jınaqtaýǵa arnalǵan jańa nanomaterıaldy zerttedi
ASTANA. KAZINFORM — Qazaqstandyq ǵalymdar jańa býyndaǵy energııa jınaqtaýǵa arnalǵan MXene nanomaterıaldaryn zerttep jatyr. Bul týraly Ǵylym komıteti habarlady.
Qazaqstandyq ǵalymdar elektr energııasyn jınaqtaýǵa arnalǵan qurylǵylarda qoldanýǵa perspektıvaly negiz retinde qarastyrylatyn, elektrótkizgishtigi joǵary modıfıkatsııalanǵan eki ólshemdi MXene nanomaterıaldaryna birqatar zertteý men synaq jumystaryn júrgizdi.
Satbayev University zertteýshileri MXene-materıaldaryn alýdyń jańa ádisterin synaqtan ótkizip, sondaı-aq olardy kremnıı men belsendirilgen kómirdi qoldaný arqyly modıfıkatsııalaý tásilderin zerttedi. Jumys barysynda alynǵan kompozıttik materıaldardyń elektrohımııalyq sıpattamalary zerdelenip, olardyń tıimdiligine salystyrmaly taldaý jasaldy.
Zertteý nátıjeleri ázirlengen kompozıttik materıaldyń dástúrli belsendirilgen kómirmen salystyrǵanda menshikti syıymdylyǵy joǵary ekenin kórsetti. Joba jetekshisi, PhD Qalıjan Shákenovtiń aıtýynsha, alynǵan nátıjeler energııany saqtaýǵa arnalǵan elektrohımııalyq qurylǵylardyń tıimdiligin arttyrýǵa jańa múmkindikter ashady.
— Bizdiń ázirlememiz jańa býyndaǵy energııa jınaqtaý júıeleriniń tıimdiligin arttyrýǵa yqpal etýi múmkin, — dedi ol.
Joba aıasynda ǵalymdar materıaldyń eksperımenttik úlgisin jasap, ol zerthanalyq synaqtardan ótti. Ǵylymı-zertteý jumystaryna ýnıversıtettiń magıstranttary men doktoranttary belsendi túrde qatysýda.
Qazirgi ýaqytta joba baǵdarlamalyq qarjylandyrý aıasynda júzege asyrylyp jatyr. Kelesi kezeńde aýqymdy synaqtar ótkizý jáne ázirlengen tehnologııany praktıkalyq qoldanysqa engizý baǵytyndaǵy jumystar jalǵasady.
Aıta ketelik qazaqstandyq ǵalymdar mehanıkalyq terbelisterdi energııaǵa aınaldyratyn qurylǵy ázirlegen edi.
