Qazaqstandyq ǵalymdar bal men zimbirden jańa sýsyn ázirledi
ASTANA. KAZINFORM – Qazaqstandyq ǵalymdar bal men zimbir negizinde alkogolsiz fýnktsıonaldy fıtosýsyn daıyndaýdyń jańa tehnologııasyn ázirledi, dep habarlaıdy AShM.
Jańa ónimdi Ulttyq agrarlyq ǵylymı-bilim berý ortalyǵynyń quramyndaǵy Qazaq qaıta óńdeý jáne taǵam ónerkásibi ǵylymı-zertteý ınstıtýtynyń ǵalymdary jasap shyǵarǵan.
Jobanyń ereksheligi – Qazaqstanda fýnktsıonaldy sýsyn óndirisinde bal men zimbirdiń mundaı úılesimi buryn qoldanylmaǵan. Ǵalymdar eki tabıǵı ónimdi bir retseptýrada biriktirip, bastapqy shıkizattyń paıdaly qasıetterin barynsha saqtaýǵa múmkindik beretin óńdeý tehnologııasyn ázirledi.
Joba aıasynda ınstıtýt mamandary sýsynnyń 40 túrli quramyn ázirlep, synaqtan ótkizgen. Zertteý nátıjeleri, dámi men ıisine qatysty kórsetkishteri jáne ekonomıkalyq tıimdiligi eskerilip, olardyń ishinen eń perspektıvaly tórt nusqa tańdaldy.
– Alynǵan sýsyndar quramyndaǵy antıoksıdanttardyń joǵary mólsherimen erekshelenedi. Tehnologııany ázirleý kezinde bal men zimbirdiń bıologııalyq belsendi komponentterin saqtaýǵa erekshe kóńil bólindi. Bul paıdaly qasıetteri aıqyn fýnktsıonaldy ónim alýǵa múmkindik beredi, – delingen ortalyq aqparatynda.
Ǵalymdardyń aıtýynsha, jańa tehnologııanyń praktıkalyq mańyzy otandyq baldy taǵam ónerkásibinde keńinen paıdalanýǵa múmkindik berýinde. Qazaqstanda bal óndirý kólemi aıtarlyqtaı bolǵanymen, ony fýnktsıonaldy sýsyndardy ónerkásiptik óndirýde paıdalaný úlesi ázirge tómen.
Jańa tehnologııa omartashylyq ónimderin óńdeýdiń qosymsha baǵytyn qalyptastyryp, qosylǵan quny joǵary ónim shyǵarýǵa múmkindik beredi.
Ázirlemege Qazaqstan Respýblıkasynyń paıdaly modelge patenti alynǵan. Sonymen qatar alkogolsiz jáne quramynda spırti az fıtosýsyndardy ónerkásiptik jolmen óndirýge arnalǵan ádistemelik usynymdar daıyndaldy.
Qazirgi ýaqytta tehnologııany tamaq ónerkásibi kásiporyndaryna engizýge bolady. Ony óndiriske shyǵarý otandyq fýnktsıonaldy sýsyndardyń túrin kóbeıtýge, omartashylyq ónimderin tereń óńdeý deńgeıin arttyrýǵa jáne qazaqstandyq ǵalymdardyń ázirlemelerin kommertsııalandyrýǵa múmkindik bermek.
Aıta keteıik, Qazaqstan ǵalymdary gektarynan 35 tonnaǵa deıin ónim beretin kartop sortyn shyǵardy.
