Qazaqstandyq ǵalymdar aýyl sharýashylyǵy ónimderin uzaq saqtaıtyn qondyrǵy oılap tapty

ALMATY. KAZINFORM – Ál-Farabı atyndaǵy Qazaq ulttyq ýnıversıtetiniń ǵalymdary fermerlik ónimderdi óńdeýge arnalǵan «Dayar 20» atty mobıldi lıofılızatsııalyq qondyrǵy jasap shyǵardy.

Bul zamanaýı qurylǵy aýyl sharýashylyǵy ónimderin tabıǵı qalpynda saqtap, olardyń sapasyn joǵaltpaı, uzaq ýaqyt boıy tutynýǵa múmkindik beredi. Qondyrǵyny tikeleı egis alqabynda, baý-baqshada nemese shalǵaı fermalarda qoldanýǵa bolady.

Joba jetekshisi, hımııa ǵylymdarynyń PhD doktory Erbol Ihsanovtyń aıtýynsha, lıofılızatsııa nemese sýblımatsııalyq keptirý – bul muzdatylǵan ónimnen sýdy tómen qysymda býlandyryp, onyń tabıǵı qurylymy men paıdaly qasıetterin saqtaıtyn ozyq tehnologııa.

«Dayar 20» arqyly keptirilgen ónimder dámin, túsin, ıisin, pishinin jáne quramyndaǵy dárýmenderin saqtaı otyryp, uzaq ýaqytqa jaramdy bolyp qala beredi. Qondyrǵy jemis-jıdek, kókónis, et, sút ónimderi, daıyn taǵamdar men balyqty joǵary sapada keptire alady.

Ihsanovtyń aıtýynsha, qurǵaq ónimderdi arnaıy tońazytqyshsyz bólme temperatýrasynda 1 jyldan 3 jylǵa deıin, al arnaıy qaptamamen 10 jyldan 50 jylǵa deıin saqtaýǵa bolady.

«Dayar 20» – fermerler úshin senimdi kómekshi ǵana emes, sonymen qatar agroónerkásiptik keshen men qaıta óńdeý salasyn jańǵyrtýǵa jol ashatyn tehnologııalyq serpilis. Bul qurylǵy, ásirese, taýly jáne shalǵaı óńirlerdegi sharýashylyqtar úshin tıimdi sheshim bolmaq. Ǵalymdar bul ınnovatsııa aýyl sharýashylyǵy ónimderiniń eksporttyq áleýetin arttyryp, azyq-túlik qaýipsizdigin qamtamasyz etýge naqty úles qosady dep otyr.

Aıta keteıik, buǵan deıin astanalyq oqýshylar kún energııasymen jumys isteıtin eko-sýburqaq jasaǵan.