Qazaqstandyq ǵalymdar ara sharýashylyǵyn tsıfrlandyrýǵa arnalǵan platformany iske qosty
ASTANA. KAZINFORM – Qazaqstandyq ǵalymdar aralardy selektsııalaý men omartalardy basqarýǵa arnalǵan alǵashqy Apislab tsıfrlyq platformasyn ázirledi. Qazir bul júıeni elimizdiń ár óńirindegi 201 omarta sharýashylyǵy paıdalanyp otyr, dep habarlaıdy Aýyl sharýashylyǵy mınıstrligi.
Joba Ulttyq agrarlyq ǵylymı-bilim berý ortalyǵynyń (UAǴBBO) ǵalymdary tarapynan «Ara sharýashylyǵyndaǵy selektsııalyq úderisti tıimdi basqarý tehnologııalaryn ázirleý» baǵdarlamasy aıasynda ázirlendi. Platforma ǵylymı zertteýlerdi, tsıfrlyq esepke alý júıesin jáne omartalardy basqarýdyń zamanaýı quraldaryn biriktirip, selektsııalyq jumystardy ǵylymı negizde júrgizýge múmkindik beredi.
Apislab úsh ózara baılanysqan komponentten turatyn biryńǵaı tsıfrlyq ekojúıe retinde jumys isteıdi. Apislab Science veb-qosymshasy ara qanattarynyń tsıfrlyq keskinderi arqyly morfometrııalyq taldaý jasap, zertteý nátıjelerin saqtaıdy. Apislab Apiary omartalardy, ara uıalary men analyq aralardy esepke alyp, óndiristik úderisterdi tirkeýge jáne biryńǵaı sáıkestendirý júıesin qalyptastyrýǵa múmkindik beredi. Al Apislab Mobile mobıldi qosymshasy omartashylarǵa ara uıalaryn tikeleı tekserip, selektsııalyq baǵalaý nátıjelerin engizýge jáne derekterdi ortaq bazaǵa avtomatty túrde sınhrondaýǵa jaǵdaı jasaıdy.
– Platformanyń basty erekshelikteriniń biri – árbir ara uıasyna biregeı sáıkestendirý nómiri men QR-kodtyń berilýi. Sonyń arqasynda omartashylar ara uıasy týraly tolyq aqparatqa jedel qol jetkizip, júrgizilgen tekserýler men basqa da is-sharalar jónindegi málimetterdi biryńǵaı aqparattyq júıede saqtaı alady, – delingen mınıstrlik habarlamasynda.
Platforma paıdalanýshylar úshin tegin. Jumysty bastaý úshin ara sharýashylyǵyn júıede tirkeý jetkilikti. Osydan keıin omartalardy tsıfrlyq esepke alý, tekserýlerdiń elektrondyq jýrnaldaryn júrgizý, mobıldi qosymshany paıdalaný jáne selektsııalyq jumystardy qoldaý quraldarynyń barlyǵy qoljetimdi bolady.
Mınıstrliktiń málimetinshe, Apislab platformasyn engizý otandyq ara sharýashylyǵyn tsıfrlandyrýǵa, selektsııalyq jumystardyń tıimdiligin arttyrýǵa, bal aralarynyń genetıkalyq resýrstaryn saqtaýǵa jáne ǵylym men óndiristiń ózara baılanysyn nyǵaıtýǵa múmkindik beredi.
Aıta keteıik, buǵan deıin omartanyń veterınarııalyq pasportyn qaıdan alýǵa bolatynyn jazdyq.
