Qazaqstandyq ǵalymdar AQSh-ta patentteletin bıotehnologııa ázirlep jatyr
ASTANA. KAZINFORM — Sońǵy jyldary JI bıologııa men medıtsına salasyna da belsendi engizilip, jańa dárilik preparattardy ázirleý úderisin jedeldetýge múmkindik berip otyr.
Jibek Joly telearnasynyń «Búgin.LIVE» baǵdarlamasynda Arlan Biotech startabynyń negizin qalaýshy, bıolog Bolat Sultanqulov jasandy ıntellekt negizindegi bıotehnologııalyq joba jaıly aıtyp berdi.
Onyń sózinshe, komanda búginde antıdeneler men nanodenelerdi qurastyrýǵa arnalǵan jasandy ıntellekt platformasyn damytyp jatyr. Qazirgi tańda joba AQSh-ta patentteýge usynylǵan.
— Nanodenelerdi antıdenelerdiń shaǵyn túri dep túsindirýge bolady. Qazir bizdiń júıe antıdeneler men nanodenelerdi jobalaýǵa múmkindik beredi. Jobany AQSh-ta patentteýge jiberdik. Sebebi bul bıotehnologııa salasyndaǵy eń iri naryqtardyń biri, — deıdi Bolat Sultanqulov.
Startaptyń tarıhy pandemııa kezeńinen bastalǵan. Zertteýshiler buǵan deıin jasaǵan dástúrli tásilderdiń múmkindigi shekteýli ekenin túsinip, jasandy ıntellekt kómegine júgingen.
— Klassıkalyq ádistermen belgili bir aqýyzǵa qarsy antıdene tabý uzaq ýaqyt alady. Al jasandy ıntellekt mıllıondaǵan nusqany qysqa ýaqyt ishinde taldap, tıimdi sheshimderdi usyna alady. Bizdiń basty artyqshylyǵymyz da osynda, — deıdi bıolog.
Onyń aıtýynsha, tehnologııa eń aldymen onkologııalyq jáne aýtoımmýndyq aýrýlardy zertteýge qajetti antıdenelerdi ázirleýdi jedeldetedi. Joba ázirge dári shyǵarmaıdy. Onyń ornyna farmatsevtıkalyq kompanııalar men ǵylymı zerthanalarǵa jańa molekýlalardy izdeýge kómektesetin tsıfrlyq qural usynady.
— Biz dári óndirýshi emespiz. Bizdiń mindetimiz — ǵalymdarǵa qajetti nusqalardy tezirek tabýǵa múmkindik berý. Keıin zerthanalar men farmatsevtıkalyq kompanııalar sol málimetterdi paıdalanyp, óz ónimderin ázirleı alady, — deıdi Bolat Sultanqulov.
Aıta keteıik, buǵan deıin, elimizde jaýyn-shashyn mólsherin kóbeıtý tehnologııasy synaqtan ótip jatqanyn jazǵan edik.
