Qazaqstandyq ǵalymdar 3D-prınterge arnalǵan manıpýlıator ázirledi
ASTANA. KAZINFORM — Qazaqstandyq ǵalymdar qurylys salasyna arnalǵan 3D-prınterdiń dáldigin arttyrýǵa múmkindik beretin jańa tehnologııa — manıpýlıatordy ázirledi. Joba avtobetonsorǵysh negizinde jumys isteıtin 3D-basyp shyǵarý júıeleriniń tıimdiligin arttyrýǵa baǵyttalǵan. Bul týraly QR Ǵylym jáne joǵary bilim mınıstrliginiń baspasóz qyzmeti jarııalady.
Ázirlengen sheshim baspa bastıeginiń ornalasýyn joǵary dáldikpen retteýge múmkindik beredi jáne betondy qabattap shyǵarý barysynda týyndaıtyn aýytqýlardyń aldyn alady. Bul tehnologııa qurylys salasynda qarqyndy damyp kele jatqan 3D-basyp shyǵarý ádisin óndiristik deńgeıde qoldanýdy jeńildetedi.
Qazirgi tańda qurylysqa arnalǵan 3D-prınterlerde baspa bastıegin pozıtsııalaý úshin negizinen portaldy, serııalyq nemese kabeldi tıptegi robottar qoldanylady. Alaıda mundaı júıeler qurylys alańyndaǵy shań, diril jáne temperatýranyń aýytqýy sııaqty kúrdeli óndiristik jaǵdaılarǵa tolyq beıimdelmegen, sondaı-aq olardy kalıbrleý kúrdeli.
Osy máseleni sheshý maqsatynda joba seriktesteri — Germanııadaǵy Drezden tehnıkalyq ýnıversıtetiniń zertteýshileri balama retinde avtobetonsorǵyshty qoldanýdy usynǵan. Degenmen, onyń ashyq kınematıkalyq qurylymy baspalaý kezinde parazıttik aýytqýlardyń paıda bolýyna ákeledi, bul óz kezeginde qurylys konstrýktsııalarynyń dáldigine keri áser etedi.
Atalǵan kemshilikterdi joıý úshin ǵalymdar arnaıy kompensatsııalaýshy manıpýlıator men betondy baspalaýǵa arnalǵan shúmekti ázirledi. Zertteý barysynda serııalyq, paralleldi jáne gıbrıdti manıpýlıatorlarǵa keshendi taldaý júrgizilip, nátıjesinde delta tıpti parallel manıpýlıator eń tıimdi sheshim retinde tańdaldy.
Joba aıasynda ınjenerlik esepteýler oryndalyp, qurylǵynyń tolyqqandy 3D modeli jasaldy. Keıin 1:1 masshtabtaǵy prototıp ázirlenip, tájirıbelik synaqtan ótti. Synaq barysynda manıpýlıator 46 keli júktememen tekserilip, onyń fýnktsıonaldyq múmkindikteri men júkkótergishtigi rastaldy. Nátıjesinde qurylǵynyń jumys qabilettiligi jáne baspa bastıegin dál pozıtsııalaý múmkindigi dáleldendi.
Jobanyń ǵylymı jetekshisi Azamat Mustafanyń aıtýynsha, bul sheshim qurylys salasyndaǵy qoldanystaǵy tehnıkany jańa tehnologııamen tıimdi úılestirýge múmkindik beredi.
— Biz ázirlegen manıpýlıator baspa bastıeginiń dáldigin arttyryp, parazıttik aýytqýlardy joıady. Bul qurylysqa arnalǵan 3D-basyp shyǵarý tehnologııasyn óndiristik deńgeıde keńinen qoldanýǵa jol ashady, — dedi ol.
Zertteýdiń ǵylymı jańalyǵy — qoldanystaǵy avtobetonsorǵyshqa mınımaldy ózgerister engizý arqyly ony qurylysqa arnalǵan 3D-prınterge beıimdeý. Bul tásil qymbat robottyq júıelerdi satyp alý qajettiligin azaıtyp, naryqtaǵy daıyn tehnıkany tıimdi paıdalanýǵa múmkindik beredi. Nátıjesinde 3D-prınterlerdiń jalpy quny tómendep, tehnologııany keńinen engizýge jaǵdaı jasalady.
Joba QR Ǵylym jáne joǵary bilim mınıstrligi Ǵylym komıtetiniń 2023-2025 jyldarǵa arnalǵan granttyq qarjylandyrý baǵdarlamasy aıasynda júzege asyrylady.
Aıta keteıik, qazaqstandyq ǵalymdar mehanıkalyq terbelisterdi energııaǵa aınaldyratyn qurylǵy ázirledi.