Qazaqstandyq ǵalym ǵylymǵa jańa bakterııa túrin engizdi
ASTANA. KAZINFORM – Qazaqstandyq ǵalym Serik Bakıev pen onyń áriptesteri ǵylymǵa buryn belgisiz bolǵan jańa bakterııa túrin anyqtady.
M.Ótemisov atyndaǵy Batys Qazaqstan ýnıversıtetiniń bıologııa, hımııa ǵylymdary jáne qorshaǵan orta bilim berý baǵdarlamalarynyń jetekshisi, PhD Serik Bakıevtiń ǵylymı zertteýleri sý ekojúıeleriniń bıoalýantúrliligin saqtaý, akvakýltýrany damytý, antıbıotıkterge tózimdi bakterııalardy zertteý jáne molekýlalyq genetıka baǵyttaryn qamtıdy.
Ǵalym ǵylymı jolyn stýdent kezinen bastap, Jaıyq-Kaspıı basseınindegi bekire tuqymdas balyqtardyń genetıkalyq qoryn zertteý jobalaryna qatysqan. Keıin ál-Farabı atyndaǵy Qazaq ulttyq ýnıversıtetinde doktorantýrada oqyp, bakterıofag endolızınderi arqyly balyqtardyń bakterııalyq patogenderin zalalsyzdandyrý tásilderin zerttegen.
2025 jyly Serik Bakıev qazaqstandyq ǵalymdar tobymen birge ǵylymǵa jańa Aeromonas oralensis bakterııasyn engizdi. Sonymen qatar ǵylym men tehnologııa salasyndaǵy jetistikteri úshin Ǵylym jáne joǵary bilim mınıstrliginiń «Ǵylym úzdigi» qurmet dıplomymen marapattaldy.
«Ǵylymı zertteýlerimiz sý ekojúıeleriniń qaýipsizdigin arttyrýǵa, akvakýltýra salasyn damytýǵa jáne mıkrobıologııalyq táýekelderdi azaıtýǵa baǵyttalǵan. Ǵylym nátıjeleriniń naqty óndiriske engizilýi biz úshin mańyzdy kórsetkish sanalady», – delingen ǵalym týraly jarııalanǵan málimette.
Búginde zertteýshiniń 59 ǵylymı jarııalanymy bar. Onyń ishinde Web of Science jáne Scopus bazalarynda ındeksteletin halyqaralyq jýrnaldardaǵy maqalalar, monografııalar, patentter men praktıkalyq usynymdar qamtylǵan.
Ǵalymnyń jetekshiligimen tabıǵı jáne jer asty sýlarynyń mıkrobıomyn zertteý, endofıtti bakterııalardy bólip alý jáne antıbıotıkterge tózimdiliktiń taralýyn baǵalaý baǵytyndaǵy jobalar júzege asyrylyp jatyr.
Aıta keteıik, Astyq sharýashylyǵy ǵylymı-óndiristik ortalyǵynda organıkalyq ónim óndirý tsehy ashylady.
