Qazaqstandyq ǵalym bilim berý salasyndaǵy jahandyq syılyqtyń laýreaty atandy
ASTANA. KAZINFORM - Nazarbayev University Joǵary bilim berý mektebiniń postdoktoranty Ásel Sharımova jas ǵalymdarǵa arnalǵan Maıkl Fýllan atyndaǵy bedeldi halyqaralyq syılyqtyń (Michael Fullan Emerging Scholar in Professional Capital and Community Award) laýreaty atandy, dep habarlaıdy Kazinform agenttiginiń tilshisi.
Ol bul marapatqa ıe bolǵan jáne Qazaqstannan ǵana emes, jalpy postkeńestik keńistikten shyqqan alǵashqy ókil bolyp otyr. 2026 jyly atalǵan syılyq álem boıynsha nebári eki zertteýshige berilgen.
Ásel Sharımova ýnıversıtettiń Joǵary bilim berý mektebinde bes jyldan beri postdoktorant retinde jumys istep keledi. Bilim berý salasy boıynsha doktorlyq dárejeni (PhD) Kembrıdj ýnıversıtetinde alǵan. Buǵan deıin Nazarbaev Zııatkerlik mektepteri júıesinde eńbek etip, bilim berý baǵdarlamalaryn ázirleý jáne halyqaralyq yntymaqtastyqty damytý baǵytynda jumys istegen.
— Meniń zertteýim muǵalimderdiń vırtýaldy kásibı qaýymdastyqtar aıasynda kásibı kapıtaldy qalaı qalyptastyryp, ony qalaı tıimdi paıdalanatynyna arnaldy. Zertteýde Qazaqstanǵa erekshe nazar aýdaryldy. Pedagogterdiń biliktiligin arttyrý salasyndaǵy tájirıbeme súıene otyryp, birlesken oqytýdyń resmı baǵdarlamalar sheńberinen qalaı shyǵatynyna qyzyǵýshylyq tanyttym. Ásirese, kásibı qoljetimdilik árkelki bolatyn reformalar jaǵdaıynda áleýmettik jelilerdiń beıresmı oqytýǵa qalaı yqpal etetinin zerdeledim. Sonymen qatar bul tásilderdi oqytý úderisine engizip, muǵalimder men zertteýshiler arasynda kásibı qaýymdastyqtardy damytýǵa qoldaý kórsetip kelemin, — dedi Ásel Sharımova.
Maıkl Fýllan atyndaǵy jas ǵalymdar syılyǵy bilim berý salasyndaǵy mańyzdy halyqaralyq marapattardyń biri sanalady. Ony Journal of Professional Capital and Community jýrnaly kásibı kapıtal men bilim berý qaýymdastyqtaryn damytýǵa arnalǵan zertteýler úshin tabystaıdy. Laýreattardy irikteý kezinde ǵylymı jańashyldyǵy, praktıkalyq mańyzy jáne bilim berý júıesine áseri eskeriledi. Jeńimpazdarǵa aqshalaı syıaqy berilip, halyqaralyq akademııalyq ortada moıyndalady.
— Bul kórnekti zertteýshiler ártúrli kontekste kásibı kapıtaldy damytýǵa baǵyttalǵan aldyńǵy qatarly ǵylymı eńbekterdi usynyp otyr. Olardyń jumystary atalǵan uǵymdy teorııalyq jáne qoldanbaly turǵyda keńeıtip, damytýǵa yqpal etedi. Kásibı kapıtal men kásibı qaýymdastyqtardy zertteýdiń bolashaǵy senimdi qolda, — dep atap ótti Journal of Professional Capital and Community basylymy.
Buǵan deıin Qaraǵandylyq oqýshynyń SAT halyqaralyq emtıhanynda Qazaqstan rekordyn jańartqany týraly jazdyq.
