Qazaqstandyq fýtbol klýbtarynyń eýrokýboktik oıyndarynda kimder tóreshi bolady

ASTANA. KAZINFORM – Qazaqstandyq klýbtardyń qatysýymen ótetin fýtboldan eýrokýbok oıyndarynda qaı eldiń tóreshileri qyzmet atqaratyny belgili boldy.

Almatylyq «Qaırat» 29 shildede UEFA Chempıondar lıgasy ekinshi irikteý kezeńinde óz alańynda Fınlıandııanyń KýPS komandasyn qabyldaıdy. Kezdesý qazaqstandyq ýaqytpen 20:00-de bastalady.

Bul oıynda bolgarııalyq Radoslav Gıdjenov bas tóreshi qyzmetin atqarsa, oǵan otandastary Mıroslav Maksımov pen Petar Mıtrev kómektesedi. Qosalqy tóreshi de sol eldiń ókili Krıstııan Kolev.

Al UEFA Konferentsııa lıgasy ekinshi irikteý kezeńinde elordalyq «Astana» syrt alańda Moldovanyń «Zımbrý» klýbymen sheberlik baıqasady. Oıyn 31 shildede qazaqstandyq ýaqytpen 22:00-ge belgilengen. 

Atalǵan kezdesýge belgııalyq Brama van Drıske bastaǵan tóreshiler brıgadasy taǵaıyndaldy. Onyń kómekshileri - Mıhele Seeldraıers pen Iv de Nev. Tórtinshi tóreshi mindeti sol eldiń ókili Kevın van Dammǵa júktelgen.

Sondaı-aq 31 shildede qazaqstandyq ýaqytpen 23:00-de bastalatyn «Aqtóbe» klýbynyń syrt alańdaǵy Chehııanyń «Sparta» (Praga) kezdesýinde ıtalııalyq Danıele Kıffı bas tóreshi bolady. Oǵan Djordjıo Perettı men Krıstıan Rossı kómektesedi. Tórtinshi tóreshi de sol eldiń ókili Danıele Perenzonı. 

Aıta ketsek, «Qaırat» alǵashqy kezdesýinde KýPS komandasyna 0:2 esebimen ese jiberdi.

Al birinshi oıynda «Astana» komandasy «Zımbrýmen» 1:1 esebimen teń oınasa, «Aqtóbe» komandasy «Sparta» (Praga) klýbyn 2:1 esebimen jeńdi.