Qazaqstandyq fýtbol klýbtaryna mıllıondaǵan aıyppul salyndy: tizimde kimder bar
ASTANA. KAZINFORM — Qazaqstan fýtbol federatsııasy (QFF) Premer-lıga klýbtaryna tártip buzýshylyqtar úshin jalpy somasy 4,41 mıllıon teńge aıyppul saldy. Jazalanǵan komandalardyń qatarynda «Altaı», «Jeńis», «Kaspıı» jáne «Aqtóbe» bar, dep jazdy INFORMSPORTS.
Qazaqstan fýtbol federatsııasynyń Baqylaý, tártiptik jáne etıkalyq komıteti 2026 jylǵy 25 qyrkúıektegi otyrysynda el chempıonatynyń 6, 25 jáne 26-týrlaryndaǵy matchtarǵa qatysty sheshimder qabyldady.
Tártiptik jazalar jankúıerlerdiń pırotehnıka qoldanýy, stadıondaǵy qaýipsizdik talaptarynyń buzylýy, matchtardyń kesh bastalýy, oıynshylardyń kóp eskertý alýy jáne ózge de oqıǵalarǵa baılanysty taǵaıyndalǵan.
Eń iri aıyppuldardyń biri «Altaıǵa» salyndy. Klýb «Qaısarǵa» qarsy kezdesýde jankúıerleriniń faıer qoldanǵany úshin 60 AEK, al bes fýtbolshysynyń sary qaǵaz alǵany úshin taǵy 100 AEK tóleýge mindetteldi. Jalpy aıyppul — 160 AEK. Sonymen qatar qaqpa torynyń búlinýine baılanysty oıynnyń úsh mınýt kesh bastalǵany úshin klýbqa eskertý jasaldy.
«Jeńis» te 160 AEK kóleminde aıyppul arqalady. «Aqtóbemen» ótken matchtyń bes mınýtqa kesh bastalǵany úshin 60 AEK, bes oıynshysynyń eskertý alǵany úshin 100 AEK aıyppul belgilendi.
«Kaspııge» de 160 AEK aıyppul salyndy. Komanda jankúıerleriniń «Qaıratqa» qarsy matchta balaǵat sózder aıtqany úshin 60 AEK tóleıdi. Al «Aqtóbemen» kezdesýde pırotehnıka qoldaný, matchtyń resmı tulǵasyn qorlaý jáne dron ushyrý faktileri úshin taǵy 100 AEK aıyppul taǵaıyndaldy.
«Aqtóbe» klýbyna jalpy 120 AEK aıyppul salyndy. Onyń 60 AEK-i «Jeńispen» oıynnyń kesh bastalýyna, qalǵan 60 AEK-i kórermenderdiń alańǵa shyǵýyna baılanysty qaýipsizdik talaptaryn qaıtalap buzǵany úshin berildi.
«Jetisý», «Qyzyljar» jáne «Ertis» klýbtarynyń árqaısysyna 100 AEK kóleminde aıyppul belgilendi.
«Jetisý» «Ertiske» qarsy matchta tórt fýtbolshysynyń sary qaǵaz alýyna, bas bapkeriniń eskertý alýyna jáne bir oıynshysynyń alańnan qýylýyna baılanysty jazalandy. Sonymen qatar Serjan Mýjıkov qarsylasyn gol soǵýdyń aıqyn múmkindiginen aıyrǵany úshin bir matchqa shettetildi.
«Qyzyljar» tórt oıynshysy men bas bapker kómekshisiniń eskertý alýyna baılanysty aıyppul tólemek.
Al «Ertis» pen «Oqjetpes» arasyndaǵy kezdesý jedel járdem kóliginiń ýaqytynda kelmeýinen toǵyz mınýt kesh bastalǵan. Osy jaǵdaı úshin pavlodarlyq klýbqa 100 AEK aıyppul salyndy.
Sondaı-aq «Oqjetpes», «Qaısar» jáne «Ordabasy» klýbtaryna 60 AEK-ten aıyppul taǵaıyndaldy.
«Oqjetpes» jankúıerleriniń faıer qoldanǵany úshin jazalansa, «Qaısar» match aıaqtalǵannan keıin bógde adamdardyń alańǵa shyǵýyna jáne jankúıerlerdiń daýys zoraıtqysh paıdalanýyna baılanysty aıyppul aldy.
«Ordabasy» men «Astana» kezdesýinde alań mańynda bógde adamdar men mototsıklderdiń bolýy, sondaı-aq jankúıerlerdiń dybys kúsheıtkish qurylǵylardy qoldanýy tártip buzýshylyq retinde tirkeldi.
«Astanaǵa» aqshalaı aıyppul salynǵan joq. Alaıda «Elimaımen» matchqa jedel járdem kóliginiń kesh kelýine baılanysty eskertý berildi.
QFF sheshimine sáıkes, klýbtar barlyq aqshalaı aıyppuldy 2026 jylǵy 25 qazanǵa deıin tóleýge tıis.
Federatsııanyń málimetinshe, tártiptik sharalar QFF-nyń qoldanystaǵy tártiptik reglamentine sáıkes qabyldanǵan.
