Qazaqstandyq fılmder tsıfrlyq platformalarda keńinen tanylady
ASTANA. KAZINFORM – Mádenıet jáne aqparat mınıstri Arman Qyryqbaev Yango Group kompanııasynyń bas dırektory Danııl Shýleıkomen kezdesti.
Taraptar kreatıvti ındýstrııalar, tsıfrlyq tehnologııalar, jasandy ıntellekti men bilim berý salalaryndaǵy yntymaqtastyqty damytý, sondaı-aq qazaqstandyq kontentti keńinen tanytý máselelerin talqylady.
Otandyq kınony tsıfrlyq platformalarda nasıhattaýǵa erekshe nazar aýdaryldy. Kınopoısktegi qazaqstandyq jańa fılmder sanyn arttyrý, fılmderdiń tusaýkeserlerine aqparattyq qoldaý kórsetý, sondaı-aq otandyq týyndylardy platformanyń taqyryptyq toptamalaryna jáne kórermenge usynylatyn fılmder tizimine engizý máseleleri sóz boldy.
Taraptar týyndylardy zańsyz kóshirý men taratýǵa qarsy kúres pen avtorlyq quqyqty qorǵaýǵa baǵyttalǵan zańnamalyq bastamalardy birlesip ilgeriletý máselesin de talqylady. Sonymen qatar óner men kıno salasynda jasandy ıntellektini qoldaný, kreatıvti ındýstrııalardy tsıfrlandyrý jáne zamanaýı tsıfrlyq daǵdylardy damytý jaıy qarastyryldy. Bilim berý salasyndaǵy yntymaqtastyq aıasynda Yandex Qazaqstan sarapshylary men tálimgerleriniń Kreatıvti ındýstrııalardy damytý qorynyń is-sharalaryna qatysý múmkindigi qarastyryldy.
Arman Qyryqbaev Yandex Qazaqstan kompanııasynyń Creative Qazaqstan jobasyn da atap ótti. Qazaqstannyń qazirgi kreatıvti ekonomıkasyna arnalǵan bul joba «Habar» jáne Qazaqstan telearnalarynda júzege asyrylyp jatyr.
Kezdesý sońynda taraptar kıno, kreatıvti ındýstrııalar, jasandy ıntellekti men tsıfrlyq bilim berý salalaryndaǵy yntymaqtastyqty odan ári damytýǵa, sondaı-aq qazaqstandyq kontentti keńinen tanytýǵa múddeli ekenin rastady.
Aıta keteıik, Bishkektegi «Ala-Too» kınoteatrynda 28–30 qyrkúıek aralyǵynda Qazaqstan kınosy kúnderi ótti.
