Qazaqstandyq fılm Nıý-Iorkte bedeldi syılyqqa usynyldy
ASTANA. KAZINFORM - Rejısser Alına Mýstafınanyń «Prıanıkı dlıa ee ottsa, moego pradeda, ee deda» derekti fılmi AQSh-taǵy eń kóne ári eń bedeldi kınofestıval – 48-shi Asian American International Film Festival aıasynda «Derekti kıno salasyndaǵy perspektıvti rejısser» nomınatsııasy boıynsha úzdikter qataryna endi.
Bul týraly QR Mádenıet jáne aqparat mınıstrligi baspasóz qyzmeti habarlady.
Kartına Qazaqstan Respýblıkasynyń Mádenıet jáne aqparat mınıstrliginiń jáne Ulttyq kınony qoldaý memlekettik ortalyǵynyń qoldaýymen túsirilgen.
Bıyl festıvaldiń derekti kıno baǵdarlamasynda álemniń túkpir-túkpirinen bar-joǵy 12 kartına ǵana usynylǵan.
«Prıanıkı dlıa ee ottsa, moego pradeda, ee deda» roýd-mývı janrynda túsirilgen fılm. Qazaqstannan úsh býyn áıel Polshaǵa, Ekinshi dúnıejúzilik soǵysta qaza tapqan óz atasynyń qabirine qaraı sapar shegedi. Fılmde túp-tamyryn izdeý, jeke tulǵany taný, urpaq sabaqtastyǵy men ótkenge qaıta oralý sııaqty taqyryptar qozǵalady.
Týyndy Pýsan halyqaralyq kınofestıvalinde (Ońtústik Koreıa) álemdik premerasy, Týrın kınofestıvalinde (Italııa) eýropalyq premerasy ótti, Cinema Verite festıvalinde (Iran) «Úzdik fılm» Gran-prıin ıelendi, «Bastaý» festıvalinde (Qazaqstan) «Úzdik debıýt» júldesin aldy, sondaı-aq Bolzano Film Festival Bozen (Italııa) jáne ORAI Festival (Abaı, Qazaqstan) arnaıy kórsetilimderinde kórsetildi. Sonymen qatar, bul fılm Qazaqstandaǵy «Synshylar tańdaýy» syılyǵynda «Úzdik debıýt» nomınatsııasyna usynylǵan alǵashqy derekti joba boldy.
Aıta keteıik, Asian American International Film Festival 2025 jylǵy 31 shilde men 10 tamyz aralyǵynda Nıý-Iorkte ótedi, al marapattaý rásimi 10 tamyzda Manhettende uıymdastyrylady.
Osyǵan deıin Abaı týraly qandaı fılmder túsiriletini týraly jazdyq.