Qazaqstandyq faıter Jalǵas Jumaǵulov UFC-ge qaıta oralýy múmkin

Jumaǵulovtyń álemdegi eń bedeldi lıgadaǵy debıýti 2020 jylǵy 11 shildede ótken UFC 251 týrnırinde ótti. Aıta keteıik, UFC-men kelisimshartty odan buryn jasaǵan Shavkat Rahmonov alǵashqy jekpe-jegin keıinirek, 2020 jylǵy 24 qazanda UFC 254 týrnırinde ótkizgen.

Jalǵas Jumaǵulov UFC-degi mansaby barysynda 2020 jyldan 2023 jylǵa deıin jeti jekpe-jek ótkizdi. Onyń tek bireýinde jeńiske jetkenimen, alty jeńilisiniń basym bóligi tóreshilerdiń ekiudaı sheshimimen tirkelgen. Sarapshylar men sportshylardyń ózderi de keıbir kezdesýlerde qazaqstandyq faıterge ádiletsiz sheshim shyǵarylǵanyn aıtqan.

2026 jyldyń tamyz aıynda Jalǵas Jumaǵulov 38 jasqa tolady. Soǵan qaramastan, ol UFC-ke qaıta oralýy múmkin. Sportshynyń aıtýynsha, bul jaı sóz emes, naqty kelissózderdiń nátıjesi.

– Kelisim boıynsha meni UFC basshylyǵymen baılanysta júrgen adam tanystyryp jatyr. Ol Hanter Kempbellmen sóılesýde. Ol meniń Oktagon lıgasynda chempıon bolǵanymdy, belbeýdi qorǵaǵanymdy biledi. Ózi «men ony burynnan baqylap júrmin, onyń chempıon ekenin bilemin, osyndaı jasta ony qaıta ákelý bizge de qyzyq» dedi. Men sońǵy eki jylda tek jeńisterge jettim, maǵan buryn múmkindik berilmedi. Qazir bes jekpe-jekten turatyn jeńis serııasy bar, oǵan qosa boksta eki jeńisim bar. Eýropalyq aýdıtorııa da qalyptasty, – dedi Jalǵas Jumaǵulov Namys Fighting YouTube arnasyna bergen suhbatynda.

Qazirgi ýaqytta Jalǵas Jumaǵulov Oktagon eýropalyq lıgasynyń eń jeńil salmaq dárejesindegi chempıony bolyp sanalady. 5 maýsym kúni ol osy uıymnyń ekinshi belbeýi úshin brazılııalyq Igor Severınoǵa qarsy jekpe-jek ótkizedi.

– Maǵan 6 maýsymǵa jekpe-jek belgilendi. Eger kelispesem, qarsylasym basqa bireýmen judyryqtasar edi. Bizde Oktagon uıymymen kelisim bar, osy jekpe-jekten keıin olar meni UFC-ge jiberýge daıyn. UFC-men de belgili bir kelisimder jasaldy. Men nege qaıta oralǵym keledi? Óıtkeni qazir ózimdi múlde basqa deńgeıdegi sportshy sezinemin. Buryn bárin ózim úırendim, qatelestim. Qazir jattyǵý, salmaq qýý, jekpe-jekke daıyndyq qalaı bolýy kerektigin túsindim. Taǵy da joǵary deńgeıge kóterile alamyn dep senemin, – dedi sportshy.

Sonymen qatar Jalǵas Jumaǵulov yqtımal jańa kelisimsharttaǵy qarjylyq sharttardyń ózi úshin mańyzdy emes ekenin aıtty.

– Maǵan aqsha mańyzdy emes. Meni qoldaıtyn aǵalarym bar, sporttan keıin de aınalysatyn isim bar. Men aqsha úshin judyryqtaspaımyn. Tipti tegin shyǵýǵa da daıynmyn, bul týraly aıttyq. Oktagon lıgasy da UFC-den kem emes, keıbir tustarda tipti jaqsy. Maǵan ol jerde bári unaıdy. Biraq men UFC-ge oralǵym keledi. Eger kelisimshart jasalmasa, mansabymdy aıaqtaıtyn shyǵarmyn, – dedi Jalǵas Jumaǵulov.

Aıta keteıik, ótken jyldyń sońynda Jalǵas Jumaǵulov jańa chempıondyq ataqqa umtylatynyn málimdegen edi.