Qazaqstandyq farmatsevtıkalyq ónimniń kólemi 22%-ǵa artty

ASTANA. KAZINFORM —  Qazaqstanda Memleket basshysynyń 2029 jylǵa qaraı otandyq dári-dármek óndirisiniń 50%-ǵa deıingi úlesine qol jetkizý jónindegi tapsyrmasyn oryndaý úshin keshendi sharalar qabyldanyp jatyr.

— 2024 jyly qazaqstandyq farmatsevtıkalyq ónimniń kólemi 22%-ǵa artyp, 171,6 mlrd teńgege jetti. Tartylǵan ınvestıtsııanyń kólemi eki esege artyp, 91,3 mln AQSh dollar boldy. Eksport 32,9%-ǵa ósip, 52,1 mıllıon AQSh dollaryna jetti. Farmatsevtıkalyq ónimniń 2 466 ataýyna 34 qazaqstandyq óndirýshimen 10 jylǵa deıingi merzimge 90 uzaq merzimdi shart jasaldy, — delingen DSM habarlamasynda.

Áleýmettik máni bar dári-dármekterge naqty qajettilikti esepke alý úshin uzaq merzimdi shart jasasý tártibi qaıta qaralyp jatyr.

Pfizer, Hoffmann-La Roche jáne AstraZeneca sııaqty álemdik kompanııalarmen kelisimsharttyq óndiris týraly kelisimshart jasaldy.

Lokalızatsııalaýǵa qoıylatyn talaptar kúsheıtildi, biregeı preparattar óndirisi yntalandyryldy, bıznes-qoǵamdastyqtyń usynystaryn eskere otyryp, normatıvtik bazany qaıta qaraý boıynsha belsendi jumys istelip jatyr.

Indýstrııalyq jáne arnaıy ekonomıkalyq aımaqtarda ornalasqan óndirýshiler úshin salyqtyq jáne ınfraqurylymdyq preferentsııalardy qosa alǵanda, jeńildikti sharttar qoldanylady.

Búgingi tańda elimizde 207 qazaqstandyq taýar óndirýshi jumys isteıdi, 2023 jyly olardyń 193-i boldy, olardyń 43-i dárilik zattardy óndirýge, 164-i medıtsınalyq buıymdardy óndirýge mamandandyrylǵan. 

Aıta ketelik dári-dármekti saraptaý ulttyq ortalyǵynyń qyzmetine tekseris júretini týraly jazǵan edik.