Qazaqstandyq et pen sút ónimderi jańa naryqqa shyqty

ASTANA. KAZINFORM — Bıyl Aýyl sharýashylyǵy mınıstrligi mal sharýashylyǵy ónimderin eksporttaý geografııasyn keńeıtý, elimizdiń halyqaralyq naryqtardaǵy ustanymyn nyǵaıtý maqsatynda birqatar shara qabyldady.

Kelissózderdiń nátıjesinde 7 memleketpen 16 veterınarlyq sertıfıkatqa kelisim jasalyp, qol qoıyldy.

Sút, iri qara jáne usaq mal eti, qus eti, bal jáne balyq ónimderin Ázerbaıjanǵa, tiri usaq maldardy Mońǵolııaǵa, jem-shópti Marokkoǵa, bylǵary men júndi Iranǵa eksporttaýǵa barlyq jaǵdaı jasalǵan. Eýropalyq Odaq qazaqstandyq bal ara sharýashylyǵy ónimderine, eń aldymen bal naryǵyna jol ashty.

Syrtqy suranystyń turaqty ósýine baılanysty et eksportynyń negizgi kórsetkishterinde oń qarqyn baıqalýda.

Bıylǵy jyldyń 10 aıynda sıyr eti eksporty 1,7 ese ósip, 30,2 myń tonnaǵa jetken bolsa, qoı eti jetkizilimderi 1,9 ese ósip, 25,5 myń tonna boldy. Bul ósim sheteldik seriktester tarapynan qazaqstandyq etke suranystyń joǵary ekenin kórsetedi.

Eksporttyq áleýetti arttyrý jumystary jalǵasyp jatyr. Qazirgi tańda Qazaqstan taǵy da 12 memleketpen kelissózder júrgizip jatyr. Basym seriktester qatarynda Japonııa, Malaızııa, Ońtústik Koreıa, BAÁ, Iordanııa jáne Pákistan bar, olarmen et jáne sýbónimder, sút ónimderin jetkizý máseleleri talqylanyp jatyr. Saýd Arabııasy, Qatar, Ulybrıtanııa, Kanada jáne Gonkongpen sút ónimderi, jem-shóp, bal eksportyn damytý máseleleri qarastyrylýda. Sonymen qatar, Ekvadormen tsısta artemııasyn eksporttaý boıynsha ózara is-qımyl jalǵasyp jatyr.

Veterınarlyq qaýipsizdik — eksporttyń kepili sanalady. Elde veterınarlyq qyzmettiń materıaldyq-tehnıkalyq bazasyn keń aýqymda jańǵyrtý jumystary istelip jatyr.

Onyń sheńberinde 400 veterınarlyq beket salyndy, 890 arnaıy tehnıka men jabdyq satyp alyndy.

Osy rette Qytaı Halyq Respýblıkasynyń qoldaýymen júzege asyrylǵan Shyǵys Qazaqstan oblysyndaǵy zamanaýı veterınarlyq zerthanany iske qosýdyń mańyzdylyǵy zor. Ol Qytaıǵa mal sharýashylyǵy ónimderin eksporttaýdy edáýir keńeıtýdi qamtamasyz etedi. Aldaǵy ýaqytta iri qara mal terilerin, qus etin, qus sharýashylyǵy sýbónimderin jáne basqa da ónim túrlerin jetkizý josparlanýda. Qajetti hattamalarǵa qol qoıylyp, qazaqstandyq kásiporyndar tıisti ınspektsııadan ótken.

Osylaısha, Qazaqstan mal sharýashylyǵy salasynyń eksporttyq áleýetin kezeń-kezeńmen nyǵaıtyp, halyqaralyq naryqtarda óz ornyn keńeıtip, agroónerkásiptik keshenniń odan ári ósýi úshin berik negiz qalyptastyrýda. 

Aıta ketelik AShM 2026 jyly «e-AÓK» tsıfrlyq ekojúıesin qalyptastyrýdy kózdep otyr.