Qazaqstandyq eskekshiler Polshadaǵy álem chempıonatynda taǵy eki fınalǵa joldama aldy
ASTANA. KAZINFORM — Qazaqstandyqtar Sergeı Emelıanov pen Marııa Brovkova baıdarka men kanoede esýden Polshanyń Poznan qalasynda ótip jatqan álem chempıonatynyń fınalyna joldama aldy.
Sergeı Emelıanov kanoede jekeleı synda 200 metrge jarystyń jartylaı fınalynda sátti óner kórsetti. Ol óz tobynda 42,99 sekýnd nátıjesimen úshinshi oryn alyp, fınalǵa ótti.
Marııa Brovkova jekeleı synda kanoede 500 metrge jarysta júlde úshin baq synaıdy. Jartylaı fınalda otandasymyz óz jarysynda 2:19,31 nátıjesimen ekinshi bolyp, sheshýshi kezeńge joldama aldy.
Buǵan deıin Marııa Brovkova men Ýlıana Kıseleva kanoede juptyq saıystyń 200 metrlik qashyqtyǵynda fınalǵa shyqqan bolatyn.
Emelıanov 28 tamyzda júlde úshin talasady. Al áıelder arasyndaǵy fınaldyq jarystar 29 tamyzǵa josparlanǵan.
Eske salaıyq, buǵan deıin Qazaqstan erkin kúresten Armenııadaǵy týrnırde alty medal jeńip alǵanyn habarlaǵan edik.
