Qazaqstandyq erler qandaı qundylyqtardy mańyzdy sanaıdy
ASTANA. KAZINFORM – Qazaqstanda maýsym aıynyń úshinshi jeksenbisinde atap ótiletin Ákeler kúni qarsańynda Qazaqstandyq qoǵamdyq damý ınstıtýty qazirgi ákelerdiń otbasy qundylyqtaryna qatysty ustanymdaryn jarııalady.
Áleýmettik zertteý nátıjesine sáıkes, qazaqstandyq er-azamattardyń 88,7%-y ata-ana bolýdy ómirindegi basty basymdyqtardyń biri dep sanaıdy. Onyń ishinde 57,2%-y áke retindegi róline joǵary mán berse, 31,5%-y ony bárinen de mańyzdy dep baǵalaǵan.
Zertteý derekteri erlerdiń basym bóligi otbasy máselesine jaýapkershilikpen qaraıtynyn kórsetedi. Atap aıtqanda, respondentterdiń 67,2%-y bala týýdy aldyn ala josparlaý qajet dep esepteıdi. Mamandardyń pikirinshe, bul kórsetkish sońǵy jyldary turaqty saqtalyp keledi.
«Zertteý nátıjeleri qazaqstandyq ákelerdiń otbasyndaǵy óz rólin mańyzdy dep qabyldaıtynyn kórsetedi. Er-azamattardyń basym bóligi ata-ana bolýdy ómirlik basymdyq retinde qarastyrady jáne bala tárbıesine jaýapkershilikpen qaraıdy. Sonymen qatar otbasy ınstıtýtyndaǵy ákeniń orny tek materıaldyq qamsyzdandyrýmen shektelmeı, tárbıe men qundylyqtardy qalyptastyrýda da mańyzdy ekeni baıqalady. Bul úrdis qazirgi qazaqstandyq qoǵamda ákelik jaýapkershiliktiń artyp kele jatqanyn ańǵartady», – delingen zertteý qorytyndysynda.
Saýalnamaǵa qatysqan er-azamattardyń 73,1%-y berekeli otbasynyń basty negizi retinde ata-ananyń ekeýiniń de bolýyn ataǵan. Bul kórsetkish áıelderdiń baǵalaýymen de sáıkes keledi, olardyń 70,6%-y osy pikirdi qoldaıdy.
Sondaı-aq zertteýge sáıkes, erler úshin otbasy eń aldymen urpaq jalǵastyrýmen baılanysty. Bul nusqany respondentterdiń 44,5%-y tańdaǵan.
Al 41,5%-y otbasyny baqyt pen mahabbattyń sımvoly dep eseptese, 37,3%-y ómirdiń máni retinde baǵalaǵan.
Aıta keteıik, «Ákeler odaǵy» tsıfrlyq dáýirdegi ákeniń róli jaıly talqylady.
