Qazaqstandyq eksporttaýshylar lıtsenzııany onlaın rásimdeı alady

ASTANA. KAZINFORM –  Otandyq shıkizatty eksporttaýǵa lıtsenzııany endi elicense.kz portalynda onlaın resimdeýge bolady. Bul týraly Ulttyq aqparattyq tehnologııalar AQ baspasóz qyzmeti habarlady.

- elicense.kz portalynda zańdy tulǵalarǵa arnalǵan otandyq shıkizat taýarlardy eksporttaýǵa lıtsenzııa alýǵa arnalǵan jańa qyzmet iske qosyldy. Qyzmet avtomattandyrylǵan jáne kásipkerlerge ótinimdi tolyǵymen onlaın rejımde berýge múmkindik beredi, - delingen habarlamada.

Lıtsenzııany resimdeý – Qazaqstan aýmaǵynda óndirilgen belgili bir sanattaǵy shıkizatty zańdy túrde eksporttaýdyń mindetti sharty. Bul jańalyq ótinim berýdi jáne onyń oryndalýyn aıtarlyqtaı jeńildetedi.

Qyzmetti paıdalaný úshin:

 elicense.kz portalynda avtorızatsııadan ótý qajet;

 «Taýarlardyń ımporty, eksporty» bólimine ótip, «Otandyq shıkizat taýarlary tizbesine engizilgen ónimderdi eksporttaýǵa lıtsenzııa berý» qyzmetin tańdaý kerek;

 elektrondyq ótinim formasyn toltyryp, qajetti qujattardy tirkeý, memlekettik baj salyǵyn tóleý qajet;

 ótinimdi ETsQ nemese QR-kod arqyly qol qoıý arqyly rastaý kerek.

- Ótinim 5 jumys kúni ishinde qaralady. Daıyn lıtsenzııa elicense.kz portalyndaǵy jeke kabınette «Ruqsattar» bóliminde kórsetiledi. Lıtsenzııa berýden bas tartylǵan jaǵdaıda, negizdemesi bar aqparat «Meniń ótinimderim» bóliminde kórsetiledi. Qyzmetti Qazaqstan aýmaǵynda zańdy tulǵalar ala alady. Lıtsenzııa bergeni úshin memlekettik baj mólsheri – 10 AEK. Tólem ekinshi deńgeıdegi bank arqyly zańdy tulǵanyń tirkelgen orny boıynsha salyq organynyń shotyna túsedi, - dep habarlaıdy Ulttyq aqparattyq tehnologııalar AQ.

Eske salaıyq, Qazaqstan BUU-nyń onlaın qyzmet ındeksi boıynsha TMD elderi arasynda kóshbasshy el.