Qazaqstandyq eki dzıýdoshy «IJF Judo Awards 2024» júldesine úmitker atandy

ASTANA. KAZINFORM – Halyqaralyq dzıýdo federatsııasy (IJF) 2024 jylǵy sport maýsymyn qorytyndylaıtyn «IJF Judo Awards 2024» júldesine úmitkerler tizimin jarııalady.

Sportty damytý dırektsııasynyń baspasóz qyzmeti atap ótkendeı, atalǵan bedeldi júldege eki birdeı qazaqstandyq tatamı sheberi úmitkerler tizimine engen.

Atap aıtsaq, Parıj Olımpıadasynyń chempıony Eldos Smetov «Erler arasyndaǵy jyldyń úzdik dzıýdoshysy (Male Judoka of the Year)», al Ǵalymjan Qyryqbaı «Úzdik ıppon (Best Ippon)» atalymynda úmitkerler qataryna qosylǵan.

«Erler arasyndaǵy jyldyń úzdik dzıýdoshysy (Male Judoka of the Year)» atalymy boıynsha Parıj Olımpıadasynyń 7 chempıony úmitker bolsa, «Úzdik ıppon (Best Ippon)» atalymynda 20 dzıýdoshynyń tańdaýly ádisi iriktelgen. Atap aıtqanda, qazaqstandyq Ǵalymjan Qyryqbaıdyń Tblısıde ótken álemdik Grand Slam jarysyndaǵy ádisi úzdikter qatarynan tabylǵan.

«IJF Judo Awards 2024» júldesine 8 atalym boıynsha 63 kandıdat usynylǵan. Úzdikterdi anyqtaý eki kezeńnen turady. Birinshi kezeń – onlaın daýys berý, ekinshi kezeń – IJF Judo Awards komıtetiniń qysqasha tizimnen tańdaýy.

Daýys berý kezeńi 10 jeltoqsannan 10 qańtarǵa deıin jalǵasady. Ár qatysýshy daýys berý kezeńinde ár atalym boıynsha bir ǵana daýys bere alady. Daýystar jiberilgennen keıin ózgertilmeıdi jáne sońǵy bolyp esepteledi. Jeńimpazdar IJF Judo Awards 2024 sharasy kezinde jarııalanady. Jeńimpazdar Paris Grand Slam 2025 kezinde ótetin tikeleı efırdegi Judo Awards 2024 marapattaý rásiminde jarııalanady.

Daýys berý myna silteme boıynsha júrgiziledi.

Osyǵan deıin qazaqstandyq sportshynyń sýrdo dzıýdodan halyqaralyq jarysta kúmis alǵanyn jazdyq.