Qazaqstandyq eki boksshy álem kýbogynda jeńiske jetti
ASTANA. KAZINFORM - World Boxing federatsııasynyń uıymdastyrýymen ótip jatqan álem kýbogynda qazaqstandyq taǵy eki boksshy jarysty jalǵastyrýǵa múmkindik aldy.
Aldymen Farýh Toqtasynov (70 keli) álem kýbogyn senimdi bastady. Ol ırlandııalyq Djon MakKonneldi 3:2 esebimen jeńdi. Endi ol 22 sáýirde 1/8 fınalda byltyrǵy álem chempıonatynyń fınalısi, japonııalyq Sevon Okazavamen judyryqtasady.
Sondaı-aq el quramasynan Dıas Moljigitov (80 keli) Japonııa boksshysy Kaı Torıabeni esh qıyndyqsyz qapy qaldyrdy. Jekpe-jek ekinshi raýndta toqtatyldy.Otandasymyz 22 sáýirde 1/8 fınalda aýstralııalyq Marlon Sevehonmen sharshy alańǵa shyǵady.
Aıta ketsek, budan buryn Nazym Qyzaıbaı (54 keli) Túrkııa ókili Aısen Taskınnen 4:1 esebimen basym tústi.
Al Janseri Kósherbaev (60 keli), Dáýlet Tólemisov (90 keli) jarysty erte aıaqtaýǵa májbúr boldy.
Bedeldi báseke Brazılııanyń Fos-dý-Igýasý qalasynda 20-26 sáýir aralyǵynda ótkiziledi.
Sondaı-aq el quramasynan álem kýbogynda olardan basqa Danııal Sábıt (50 keli), Baǵlan Kenjebek (55 keli), Muhammedsabyr Bazarbaıuly 65 keli, Sanjaráli Begalıev (75 keli), Sultan Aıbaruly (85 keli) sharshy alańǵa shyǵady.
Al áıelder quramasynda Alýa Balqybekova (55 keli), Vıktorııa Grafeeva (60 keli), Aıda Ábikeeva (65 keli), Natalıa Bogdanova (70 keli), Jibek Jarasqyzy (80 keli), Valerııa Aksenova (80 keliden joǵary) bar.
Kúndizgi sessııa Qazaqstan ýaqytymen 19:00 -de jáne keshki sessııa 01:00–de bastalady.
