Qazaqstandyq dzıýdoshylar Azııa chempıonatynyń altyny úshin kimdermen kúsh synasady
ASTANA. KAZINFORM - Ordos qalasynda (Qytaı) ótip jatqan dzıýdodan Azııa chempıonatynda aralas komandalyq saıysta Qazaqstan quramasy fınalǵa joldama aldy, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
Fınalǵa shyǵý úshin qazaqstandyqtar Birikken Arab Ámirlikteri quramasymen kezdesti. 6-ǵa 6 formatynda ótken komandalyq báseke 3:3 esebimen teń aıaqtaldy. Jerebe qorytyndysy boıynsha sheshýshi beldesý 70 kelige deıingi salmaq dárejesinde ótti. Bul kezdesýde qazaqstandyq dzıýdoshy Móldir Narynova jeńis upaıyn alyp, komandasyn fınalǵa shyǵardy.
Qazaqstan quramasy sapynda Baqyt Qusaqbaeva (-57 kg), Móldir Narynova (-70 kg), Nazgúl Maratova (+70 kg), Anýar Jumageldın (-73 kg), Aıbol Nysanáli (-90 kg), Marat Baıkamýrov (+90 kg) óner kórsetti.
Endi Qazaqstan aqtyq saıysta Mońǵolııamen kúsh synasady.
Fınaldyq beldesý Astana ýaqytymen saǵat 13:00-de ótedi.
Osyǵan deıin dzıýdodan Azııa chempıonatynda Qazaqstan quramasy jartylaı fınalǵa ótkeni týraly jazdyq.
