Qazaqstandyq dostarymyzdy 9 mamyrda Jeńistiń 80 jyldyǵynda kútemiz — RF Prezıdenti
ASTANA. KAZINFORM — Reseı men Qazaqstan arasyndaǵy ózara árekettestikte gýmanıtarlyq baılanystar mańyzdy oryn alyp otyr. Bul týraly Reseı Federatsııasynyń Prezıdenti Vladımır Pýtın Qazaqstan Respýblıkasyna kezekti memlekettik sapary aıasynda «Kazahstanskaıa pravda» gazetinde basylǵan maqalasynda aıtty.
«Eki tarap ta mádenıet, sport, qoǵamdyq jáne jastar arasynda, sondaı-aq bilim berý salasynda yntymaqtastyqty keńeıtý úshin kóptegen jumys atqarýda. Reseıdiń joǵary oqý oryndarynda shamamen 60 myń qazaqstandyq stýdent oqyp júr. Al Qazaqstanda Lomonosov atyndaǵy MMÝ sekildi jetekshi reseılik ýnıversıtetterdiń fılıaldary tabysty jumys tur. Jaqynda Astanada Reseı Syrtqy ister mınıstrliginiń Máskeý memlekettik halyqaralyq qatynastar ınstıtýtynyń (MGIMO) fılıaly da ashylmaq, onyń túlekteri arasynda tanymal qazaqstandyqtar, sonyń ishinde Qasym-Jomart Kemeluly Toqaev ta bar», — dep eske saldy RF Prezıdenti.
Sondaı-aq Reseı Prezıdenti kelesi jyly qos memleket Ekinshi dúnıejúzilik soǵystaǵy Jeńistiń 80 jyldyǵyn atap ótetinin tilge tıek etti. Osy rette Vladımır Pýtın Qasym-Jomart Toqaevty 9 mamyrda Máskeýde ótetin aýqymdy is-sharaǵa shaqyrdy.
«Prezıdent Toqaevty jáne qazaqstandyq dostarymyzdy 9 mamyrda Máskeýde ótetin mereıtoılyq sharalarda kútemiz. Reseıde de, Qazaqstanda da halyq ákeleri men atalarynyń natsızmge qarsy ıyq tirese kúresken erligin umytqan joq jáne qurmetpen este saqtaıdy. Al biz, árıne, bolashaq urpaq beıbitshilik pen bostandyq qandaı baǵamen qorǵalǵanyn este saqtaýy úshin barlyǵyn isteýimiz kerek. Bul, ásirese, teń quqyqty yntymaqtastyqqa negizdeletin jáne egemendi damýdyń jańa múmkindikterin ashatyn kóppolıarly álemdik tártip qalyptasyp jatqan ýaqytta erekshe mańyzǵa ıe», — dedi Reseı Prezıdenti.
Eske sala keteıik, buǵan deıin Prezıdenttiń shaqyrýymen Vladımır Pýtın Qazaqstanǵa memlekettik saparmen keletinin jazǵan bolatynbyz. Osy oraıda, elimizdiń bedeldi basylymdarynyń biri — «Kazahstanskaıa pravda» gazetinde maqalasy jarııalanyp, irgeles memleket basshysy eki el arasyndaǵy yntymaqtastyq týraly oıyn jetkizdi.