Qazaqstandyq dızaınerler Qytaıda jańa toptamalaryn tanystyrdy
ASTANA. KAZINFORM — Qazaqstandyq dızaınerler Respýblıka kúnine oraı Qytaı astanasynda ulttyq mura men baı mádenıetti zamanaýı estetıka jáne premıým stılmen úılestirgen jańa toptamalaryn tanystyrdy. Bul týraly Kazinform agenttiginiń Beıjińdegi menshikti tilshisi habarlady.
«Altyn dala — Jibek jolynyń jańǵyryǵy» sán kórsetiliminde qazaqstandyq dızaınerler halyqaralyq kórermender men joǵary sándi baǵalaıtyn qaýymǵa avtorlyq týyndylary men biregeı buıymdaryn usyndy.
Qazaqstandyq kýtıýrelerdiń Qytaıǵa saparyn uıymdastyrǵan QazTrade saýda saıasatyn damytý ortalyǵy bas dırektorynyń orynbasary Aınur Ámirbekova kreatıvti ındýstrııany ilgeriletý otandyq ónimderdiń syrtqy naryqqa júıeli túrde shyǵýyna baǵyttalǵanyn atap ótti.
— Bizdiń dızaınerler ulttyq dástúrlerdi álemdik sán úrdisterimen sátti úılestiredi. Ár brendtiń artynda ózindik tarıhy, shyǵarmashylyq ıdeıasy jáne kásipkerlik batyldyǵy tur. Otandyq sán ındýstrııasynyń halyqaralyq arenaǵa, sonyń ishinde Qytaı naryǵyna shyǵý áleýeti joǵary dep esepteımiz. «QazTrade» óz kezeginde óndirýshilerge jan-jaqty qoldaý kórsetýdi jalǵastyryp, olardyń bıznesin shetelde keńeıtýine, senimdi seriktester tabýyna jáne ónimderin ilgeriletýine kómektesedi, — dedi ol.
Onyń aıtýynsha, mundaı is-sharalardyń maqsaty — sheteldik seriktestermen turaqty yntymaqtastyq ornatý. Bul baǵytta «QazTrade» kompanııasynyń Beıjińdegi seriktestik keńsesi belsendi jumys isteıdi. Budan bólek, jaqyn arada «Altyn dala» saýda úıi ashylady. Ol Qazaqstan ónimderin turaqty tanystyratyn jáne tikeleı eksporttyq jetkizilimderdi damytýǵa múmkindik beretin alańǵa aınalady.
— Búgingi kórsetilim qazaqstandyq «Sandyq» meıramhanasymen birlesip uıymdastyryldy. Sonyń arqasynda Qazaqstandy sán men dızaın arqyly ǵana emes, ulttyq taǵamdary arqyly da tanystyrýǵa múmkindik týdy. Qazaqstannyń Qytaıdaǵy elshiligi men Beıjińdegi Qazaqstannyń mádenı ortalyǵynyń qoldaýy bul bastamany júzege asyrýǵa jol ashty. Osylaısha, mádenı dıplomatııa men eksportty damytý mindetteri ózara ushtasty, — dep túıindedi Aınur Ámirbekova.
Jobanyń kreatıv dırektory Sábına Jıenbaevanyń aıtýynsha, sán kórsetilimi qazaqstandyq sán ındýstrııasynyń úzdik ókilderin bir alańǵa jınady.
— Bizge asa talantty dızaınerler keldi. Shoýdyń negizgi maqsaty — Qytaı kórermenderine elimizde dızaın ındýstrııasy qarqyndy damyp kele jatqanyn jáne biregeı brendter kóp ekenin kórsetý. Aldaǵy ýaqytta mundaı jobalar kóbeıedi dep úmittenemiz, — dedi ol.
Sán kórsetiliminiń artynda qazaqstandyq kýtıýreler Qytaı astanasyna sapary týraly áserin bólisti.
BAY brendiniń negizin qalaýshy Baný Ǵaıdar toptamasynyń qazaq dástúrlerindegi tereń maǵynalardan shabyt alǵanyn aıtty. Kıim dızaınynda, sonyń ishinde fýtbolkalarda, ósý men yntany bildiretin «qus qanaty», bereke men molshylyqtyń nyshany sanalatyn «qoshqar múıiz» jáne otbasy oshaǵyn beıneleıtin kıiz úıdiń beınesi qoldanylǵan.
— Biz Atyraýda týyp-óskenbiz jáne kúndelikti kııýge yńǵaıly zamanaýı kıim arqyly ulttyq mádenıetimizdi nasıhattaýǵa tyrysamyz. Brend ónimderi Beıjińdegi «Altyn dala» saýda úıinde satylyp, suranysqa ıe bolyp otyr. Sondaı-aq AQSh pen Eýropadaǵy dıaspora ókilderi arasynda da tanymal. Ónimderimiz Germanııa, Soltústik Makedonııa jáne Ońtústik Koreıada usynylǵan. Jaqynda Ońtústik Koreıada bizdiń shoýrým ashyldy. Beıjińge sapardan kútken úmitimiz tolyq aqtaldy, — dedi ol.
Óz atymen atalatyn brendtiń negizin qalaýshy ári dızaınerler áýletiniń úshinshi býynynyń ókili Medına Saqtaǵanovanyń aıtýynsha, ol Beıjińde 2023 jylǵy qyrkúıekte Nıý-Iorkte ótken sán kórsetiliminiń jetistigin qaıtalaı aldy. Defılede qazaqtyń dástúrli etnostıli men zamanaýı sán úrdisterin ushtastyrǵan toptama usynyldy. Kórsetilimniń sharyqtaý shegi qalyńdyqtyń sándi obrazy boldy. Brend Qytaı naryǵynda ázirshe resmı túrde usynylmaǵanymen, kompanııa bul eldegi qatysý aıasyn keńeıtýdi josparlap otyr.
— Búgin biz toptamamyzdy Beıjińde alǵash ret tanystyryp otyrmyz. Osy oqıǵaǵa arnaıy «Jibek dıalogy» atty kıim toptamasyn ázirledik. Onyń tujyrymdamasy mádenı kodtar, matalardyń faktýrasy, túsi men túrleri arqyly vızýal kontenttegi zamanaýı qarym-qatynasty beıneleıdi. Kórsetilimde jeti negizgi obraz usynyldy. Defıle tabysty ótti, — dedi óz atymen atalatyn brendtiń negizin qalaýshy ári dızaıner Tatıana ıAn.
Sándi dızaınerlik kıimderden bólek, kórmede ulttyq bolmysty beıneleıtin qazaqstandyq zergerlik buıymdar da usynyldy.
— Bul — brendimizdi halyqaralyq arenada alǵash ret tanystyrýymyz. Biz Qazaqstanda da zergerlik buıymdar óndirisi bar ekenin kórsetkimiz keldi. Zamanaýı áshekeıler arqyly brendimiz elimizdiń tarıhy men mádenı kodyn saqtap, ony kópshilikke tanystyrady. Qytaıda da jergilikti óndirýshiler ulttyq qundylyqtardy zamanaýı dızaınmen ushtastyratynyn baıqadyq. Fılosofııamyzdaǵy osy ortaqtyq yntymaqtastyqqa berik negiz qalaıdy. Biz seriktestik baılanystardy damytyp, halyqaralyq naryqqa shyǵýǵa úmittimiz, — dedi Kazyna Gold zergerlik úıiniń dırektory Gúlmıra Ábrahmanova.
Sán ındýstrııasynyń qytaılyq ókilderi kórsetilim kezinde onyń ózderine erekshe áser qaldyrǵanyn aıtyp, qazaqstandyq dızaınerlerdiń deńgeıi men Qytaı naryǵyndaǵy qatysýyn keńeıtý múmkindikterin joǵary baǵalady.
Etnotaqyryp pen dástúrli zergerlik áshekeılerge basymdyq beretin brendterge Qytaı naryǵyna shyǵý strategııasyn mádenı áralýandyǵy men ulttyq azshylyqtardyń dástúrleri baı óńirlerden bastaýdy usyndy. Bul ónimderdi jergilikti aýdıtorııanyń suranysyna barynsha úılesimdi beıimdeýge múmkindik beredi.
Eske salaıyq, buǵan deıin Ankarada TÚRKSOI uıymynyń IX Áıelder jáne etno-sán aptalyǵy bastalǵanyn habarlaǵanbyz. Oǵan túrki álemindegi memleketter men óńirlerdiń dızaınerleri jáne mádenıet ókilderi jınaldy.
