Qazaqstandyq dızaınerler Djeı Lonyń sahnalyq kostıýmderin daıyndady

ASTANA. KAZINFORM – Qazaqstandyq brend Djeı Lo men onyń komandasynyń kostıýmderin daıyndady. Álemdik juldyzben jumys isteý qanshalyqty qıyn? Sheteldik ónerpazdar qazaqstandyq mamandardyń jumysyna qandaı baǵa berdi? 

Jibek Joly arnasynyń «Búgin LIVE» baǵdarlamasyna qonaq bolǵan otandyq dızaınerler jaýap berdi. 

– Kontsertti uıymdastyrýshylar Djeı Lo komandasymen jumys isteý úshin bizge usynys jasady. Árıne, bul – úlken mártebe. Sondyqtan birden kelistik, - deıdi Zııada Bekbasova.

Kásibıligine kóz jetkizgen soń juldyzdyń komandasy Djeı Lonyń kostıýmderin de qaıta qalypqa keltirý úshin qazaqstandyq mamandarǵa senip tapsyrypty.

– Barlyq obrazdy tolyqtaı daıyndadyq. Bıshiler, laıv-bend, bek-vokalda jumys isteıtin ártisterdiń árqaısysynda 5-6 kostıýmnen boldy. Juldyzdyń komandasy sheberligimizge kóz jetkizgen soń, Djeı Lo kıetin kostıýmderiniń ózin restavratsııalaýǵa berdi. Asqar esimdi bas sheberimiz bar. Ol óz qolymen kostıýmderdiń tastaryn tolyqtyryp, tigip shyqty, - deıdi stýdııa qonaǵy.

Kostıýmerler álemdik deńgeıdegi ónerpazben jumys isteý úlken jaýapkershilikti talap etkenin de jasyrmady. 

– Otandyq juldyzdardyń kontsertinde kóp degende 10 shaqty kostıým ǵana bolady ǵoı. Al Djeı Lo komandasynda barlyq kıiminen bastap, tipti shulyqtaryna deıin ıesiniń aty jazylyp turady. Ár kıimniń qaı jerde turý kerektigi naqty bekitilgen. Biz kıimderdi sektor-sektorǵa bólip, olardyń talabyna saı ornalastyrdyq. Sosyn bas kostıýmer bárin jeke-jeke tekserip, qarap shyqqan soń ǵana qabyldap aldy, - deıdi Altynaı Rakısheva. 

Djeı Lonyń komandasy qazaqstandyq mamandardyń jumysyna dán rıza bolǵan kórinedi. 

– Aǵylshyn tilinde erkin sóılegendikten, komandamen baılanys ornatý jeńil boldy. Olar jumysymyzǵa rıza bolyp, bizdi sahna artyna arnaıy shaqyrdy. Sol jerde turyp kontsertti tamashaladyq. Buǵan deıin basqa eshqandaı kontsertte mundaı erkindik berilip, dızaınerler men kostıýmerler keshti birge tamashalamaǵanyn aıtty. Bizge arnaıy bilezik taǵyldy, - deıdi stılıst-kostıýmerler.

Dızaınerlerge Djeı Lonyń kontserttik týryna arnalǵan ónimderdi tigýdi de usynypty.

– Djeı Lonyń kontserttik týry aıasynda bizge osy týrǵa arnalǵan merch ónimderin jasap shyǵarý usynyldy. Biraq, ókinishke qaraı, ýaqyt tym qysqa boldy. Sol sebepti bul usynystan bas tarttyq. Sebebi, sapaly ári erekshe ónimdi az ýaqytta jasap shyǵarý múmkin emes. Al bizdiń basty maqsatymyz – ár ónimimizdi sapaly ári minsiz etip shyǵarý, - deıdi Zııada Bekbasova.

Eske sala keteıik, birneshe kún buryn elordada Djenıfer Lopestiń kontserti ótken edi. Endi álemdik mega-juldyzdyń ónerin 10 tamyz kúni Almatyda tamashalaı alasyzdar.