Qazaqstandyq DIGA Bolashaq oıyndarynda PUBG boıynsha jeńiske jetti
ASTANA. KAZINFORM – Qazaqstandyq DIGA komandasy «Bolashaq oıyndary-2026» halyqaralyq týrnırinde PUBG: Battlegrounds dıstsıplınasy boıynsha ekinshi oıyn kúniniń úshinshi matchynda jeńiske jetti.
Sheshýshi sátte otandyq kıbersportshylar saýatty taktıkalyq oıyn kórsetti. Komanda match sońyna deıin tórt oıynshysynyń barlyǵyn saqtap qalyp, sońǵy kezeńde Saýd Arabııasynyń Geekay komandasyn qyspaqqa alyp, jeńisti óz paıdasyna sheshti.
Jeńisti oıynnan keıin qazaqstandyq DIGA komandasynyń oıynshysy Sanjar Qalıev alǵashqy kúnnen keıin ujymnyń oıyny aıtarlyqtaı jaqsarǵanyn aıtty.
– Birinshi kún biz úshin beıimdelý kezeńi boldy. Qarsylastardyń oıyn mánerin zerttep, lobbıge úırenýimiz kerek edi. Bul biz úshin osyndaı aýqymdy LAN-týrnırdegi alǵashqy tájirıbe ári úlken mártebe. Ekinshi kúni birden jeńiske jetken soń ózimizdi áldeqaıda senimdirek sezindik. Buǵan eń aldymen tyńǵylyqty daıyndyq kómektesti. Sonymen qatar komandada myqty IGL, ony qoldaıtyn tájirıbeli rıfler jáne taǵy bir úzdik oıynshy bolýy qajet. Barlyǵyn sheshetin nárse – oıynshylar arasyndaǵy ózara úılesim. Naǵyz myqty komandanyń formýlasy osy, – dedi ol.
Sanjar Qalıevtiń aıtýynsha, sheshýshi matchta komanda oıyn aımaǵynyń tıimdi ornalasýyn sátti paıdalanyp, aldyn ala josparlanǵan taktıkany júzege asyrǵan.
– Aımaq bizge qolaıly boldy. Óz pozıtsııamyzdy bekitip, ol jerge eshkimniń kelmeıtinine kóz jetkizdik. Sonyń arqasynda sońǵy matchta jeńiske jettik, – dedi oıynshy.
Kıbersportshy óz mansabynyń qalaı bastalǵanyn da eske aldy.
– PUBG oıynyn segiz jyldan beri oınaımyn, onyń alty jylyn kásibı deńgeıde ótkizdim. Barlyǵy kezdeısoq bastaldy. Bir kúni PUBG oıynyn iske qosyp kórdim, unap qaldy. Keıin týrnırlerge qatysa bastadym. Búginde osyndaı halyqaralyq jarysta óner kórsetip júrmin, – dedi Sanjar Qalıev.
Sóz sońynda ol qazaqstandyq jankúıerlerge alǵysyn bildirdi.
– Bizdi qoldap, arenaǵa kelip, matchtardy tamashalap, jankúıer bolyp júrgen barshańyzǵa úlken raqmet. Biz bárin kórip otyrmyz jáne bul bizge úlken kúsh beredi. Qolymyzdan keletin eń úzdik oıyndy kórsetýge tyrysamyz, – dedi ol.
Aıta keteıik, buǵan deıin, Bolashaq oıyndaryna PUBG boıynsha Qazaqstan atynan jalǵyz komanda qatysatynyn jazǵan edik.
