Qazaqstandyq delfııshiler TMD oıyndarynda 11 medal jeńip aldy
ASTANA. KAZINFORM — Qazaqstan quramasy 5-9 qazan aralyǵynda Tájikstan astanasy Dýshanbede ótken TMD elderiniń XX jastar delfıı oıyndarynda 11 medal jeńip aldy. Bul týraly Kazinform agenttiginiń Dýshanbedegi menshikti tilshisi habarlady.
Qazaqstan komandasynyń qorjynynda tórt altyn, úsh kúmis jáne tórt qola medal bar. Osy nátıjeniń arqasynda Qazaqstan beıresmı komandalyq esepte úzdik úshtikke endi.
Baıqaýǵa Ázerbaıjan, Armenııa, Belarýs, Qazaqstan, Qyrǵyzstan, Reseı, Tájikstan, Túrikmenstan jáne Ózbekstannan 10-25 jas aralyǵyndaǵy ónerli jastar qatysty. Olar fortepıano, skrıpka, beıneleý óneri, akademııalyq, halyqtyq jáne estradalyq án aıtý, halyq bıi, úrmeli jáne halyq aspaptarynda oryndaý, sándik-qoldanbaly óner sekildi 10 nomınatsııa boıynsha baq synady.
Qazaqstan quramasyna eń kóp júldeni ánshiler saldy. «Akademııalyq án aıtý» nomınatsııasynda 17-21 jas sanatynda Nazgúl Baımenova birinshi, Nuraı Saıynova ekinshi oryn aldy. Al 22-25 jas sanatynda Aıajan Serǵalı qola júldeger atansa, Madııar Aıdarbek dıplomant boldy.
«Halyq áni» nomınatsııasynda Aızere Tóleý jeńiske jetti. Uldany Bısenbi 14-17 jas sanatynda úshinshi oryn ıelendi. «Estradalyq án aıtý» nomınatsııasynda Dámeli Birjanova ekinshi oryn alsa, Asyl Murat «Úzdik kostıým» arnaıy júldesine ıe boldy. Bul sanatta olar 14-17 jas aralyǵyndaǵy qatysýshylar arasynda óner kórsetti. Al 18-25 jas sanatynda Altynaı Áıten qola medal jeńip aldy.
Aspapta oryndaýshylar arasynda 14-17 jas sanatynda Aıtóre Azamatuly «Fortepıano» nomınatsııasy boıynsha birinshi orynǵa ıe boldy. Dosjan Nurdáýlet (14-17 jas) pen Jandar Serikhan (18-25 jas) dıplomant atandy.
«Halyq aspaptary» nomınatsııasynda 14-17 jas sanatynda Ahmet Nurpeıis kúmis medal jeńip aldy. Eraly Isaev (14-17 jas) pen Kámıla Qanafına (18-25 jas) dıplomant atandy.
«Úrmeli aspaptar» nomınatsııasynda 14-17 jas sanatynda Dildá Serikhan úshinshi oryn aldy. Al skrıpkashy Regına Djambazova dıplomant atanyp, arnaıy júldege ıe boldy.
Qazaqstan quramasyna taǵy bir altyn medaldi 15-18 jas sanatynda «Sándik-qoldanbaly óner» nomınatsııasynda óner kórsetken Ánel Rysbek syılady.
Kazinform agenttigine bergen suhbatynda Ulttyq delfıı komıtetiniń dırektory Quralaı Túspekova Qazaqstan halyqaralyq oıyndarda dástúrli túrde joǵary nátıjeler kórsetip kele jatqanyn aıtty.
— Quramanyń joǵary nátıjesi — ulttyq kezeńdegi qazylar alqasy tóraǵalarynyń júıeli tálimgerlik jumysynyń jemisi. Qazaqstannyń eńbek sińirgen qaıratkerleri fınalısterdiń daıyndyǵyn jeke úılestirip, olardyń oryndaýshylyq sheberligin shyńdaýǵa jáne baıqaýǵa arnalǵan repertýaryn qalyptastyrýǵa kómektesti, — dedi Quralaı Túspekova.
Eske salaıyq, buǵan deıin AQSh-tyń Merılend shtatyndaǵy Montgomerı okrýginde, Vashıngtonnan shamamen 10 mınýttyq jerde ornalasqan Carderock Recreation Area saıabaǵynda qazaq dıasporasy uıymdastyrǵan «Bas qosý» pıknıgi ótkeni jaıly jazǵan edik.
