Qazaqstandyq DarkSwitch oıyny álemdik naryqty baǵyndyryp jatyr

ASTANA. KAZINFORM – 230 myńnan astam qoldanýshy oıyndy kútý tizimine qosty. Oıyn óz janrynda aptanyń top-5 eń kóp kútiletin oıyndarynyń qataryna enip, sıtıbılderler arasynda 8-orynǵa kóterildi.

Astana Hub qatysýshysy — Cyber Temple stýdııasy DarkSwitch oıynyn usyndy. Ol jaryqqa shyqpaı turyp-aq, jahan nazaryn jaýlaǵan jobalarmen ıyq tiresti. Oıynnyń mýzykasyn japon kompozıtory Akıra ıAmaoka jazdy. Onyń qorjynynda asa tanymal Silent Hill serııasynyń saýndtrekteri de bar. Osylaısha, otandyq oıyn ındýstrııasy álemge tanylǵan avtormen jarqyn áriptestik ornata alatynyn aıshyqtaı tústi. 

Joba qoldanýshylardyń nazaryn ańdatpa kezinde aýdaryp úlgerdi. 230 myńnan astam qoldanýshy oıyndy kútý tizimine qosty. Oıyn óz janrynda aptanyń top-5 eń kóp kútiletin oıyndarynyń qataryna enip, sıtıbılderler arasynda 8-orynǵa kóterildi.

DarkSwitch — dark-fentezı álemindegi qala qurylysy sımýlıatory jáne ekonomıkalyq strategııa kórinisi. Oıynshynyń negizgi mindeti — jumbaq tumannan tónetin qaýipten qorǵaný úshin alyp aǵashtardyń aınalasynda qalany damytyp, qonystyń ómirsheńdigin saqtaý. Joba mazmundy álemimen, aıqyn keıipkerlerimen jáne ár sheshim qalaǵa da, keıipkerler taǵdyryna da áser etetin sıýjetimen erekshelenedi.

Kompanııanyń negizin qalaýshy ári bas dırektory Alekseı Nazarovtyń aıtýynsha, DarkSwitch jobasyn 50-den astam mamannan quralǵan halyqaralyq komanda ázirlegen, olardyń jartysynan kóbi — qazaqstandyqtar. Sondaı-aq jobaǵa TMD elderi, Ispanııa, Polsha, Serbııa, AQSh, Ulybrıtanııa, Qytaı jáne Japonııa mamandary atsalysqan.

— DarkSwitch jobasyna kóp kúsh jumsap, janymyzdy saldyq. Tórt jyldan astam ýaqytymyzdy arnadyq. Alǵashqy pikirlerdi oqyp, sol eńbektiń aqtalǵanyn kórip otyrmyz. Relızge birneshe kún qalǵanda SteamDB platformasyndaǵy Upcoming Releases bóliminde 5-orynǵa shyǵý jarqyn nátıje dep bilemin. Bul DarkSwitch-tiń álemdegi myńdaǵan joba arasynda eń kóp kútiletin oıyndardyń biri ekenin dáleldeıdi. Jobanyń nátıjesine qaraı ony ári qaraı damytamyz: oıyndy konsolder men basqa qurylǵylarǵa beıimdeımiz, qosymsha kontent (DLC) shyǵaramyz, sondaı-aq jańa bastamalardy iske qosamyz, — dedi ol.

Jobanyń basty ereksheligi — qalanyń tik arhıtektýrasy. Shekteýli keńistik kóp deńgeıli ınfraqurylym qurýdy talap etedi. Oıynda 80-nen astam ǵımarat túri men birneshe tehnologııalyq deńgeı bar. Barlyq grafıka qolmen jasalǵan, bul oıynnyń biregeı stıli men áserin kúsheıtedi.

Oıyn básekeli naryqtarǵa baǵyttalǵan. Qazirgi tańda alty tilde qoljetimdi: aǵylshyn, frantsýz, nemis, qytaı, orys jáne polıak tilderi. Dybystaý aǵylshyn jáne orys tilderinde usynylǵan. Jahandyq ónim jasaı otyryp, stýdııa qazaq tilindegi nusqasyn ázirlep jatyr. Komanda úshin álemniń túkpir-túkpirindegi qoldanýshylar oıyndy júktegen saıyn Qazaqstannyń týyn kórýi mańyzdy.

DarkSwitch relızi otandyq geımdev ındýstrııasynyń jańa kezeńge ótkenin kórsetedi. Elde jahandyq naryqqa baǵyttalǵan, halyqaralyq aýdıtorııanyń nazaryn aýdara alatyn ónimder jasaıtyn ázirleýshiler qalyptasyp keledi.

Aıta ketelik Qazaqstandyq kıbersportshy HLTV nusqasy boıynsha álemniń úzdik debıýtanty atanǵan edi.